Den e famoso y mundialmente famoso Domino Square Garden, a tuma luga e torneo di domino estilo “5 X 5”, un formato nobo den bush league di domino. Tres ekipo a participa e anochi ey, esta BIBA LEKKER DT, TAXI BOYS DT, y CASHERO HILLS. Lider di Biba Lekker, Tony Trimon, a splica algo dje formato aki. Lo tira lot y dos team lo enfrenta otro hungando 1 wega riba 5 mesa. Despues dje prome rondo ey, e otro team lo enfrenta e team cu a score menos wega den prome rond; y su siguiente rond, e dos teamnan cu no a enfrenta otro ainda ta hunga e ultimo buelta.
Di aki nan ta saca e dos teamnan cu a score mas hopi wega, y e dos ekiponan aki ta bay p’e gran final riba 5 mesa. Pa compronde miho, cada rond ta consisti di 5 wega te 100, cada wega riba un mesa apart, dus 5 mesa. En total, den rondo preliminatorio, lo tin 15 wega (A vs B; A vs C; B vs C), y e gran final lo tin 5 wega; un total pues di 20 wega p’e anochi.
Den e prome rond, e ekipo di Biba Lekker a sa di clacifica cu 12 punto pa bay final. Sinembargo, e dos teamnan di Taxi Boys y Cashero Hills a keda n’un empate cu cada un 9 punto. Mester a bin 1 wega extra na un solo mesa pa dicidi ta cua ekipo lo bay e gran final contra Biba Lekker. Aki, Cashero Hills a logra sali triunfador y a sigui p’e final, poniendo Taxi Boys automaticamente na di 3 luga.
Den e gran final, parce cu Cashero Hills a haya “de smaak te pakken”! Sin duna Biba lekker niun chens, e trabuconan di Cashero a baha brabo for di e colinanan di Cashero y a sa di caba cu tur “sweet life” di Biba Lekker DT triunfando c’un score impresionante di 4-1! All in all, un tremendo anochi yen di ambiente, introduciendo un formato nobo den Bush League di domino.
