Promer cu tratamento di un caso penal den sala di Corte, Corte Superior a haye confronta cu un situacion caminda cu Hof mester a pospone e caso.
SOLO DI PUEBLO por a compronde cu door di protesta di abogado di e acusado Chines, Hof a pospone e caso.
Hof di Corte Superior mester a trata e apelacion di Ministerio Publico contra e decision di Hues di Corte den Promer Instancia, cu a declara e homber Chines Z.X. liber di intento di mata y intento di maltrato severo riba 30 Juni 2021.
A RECHAZA USA TRADUCTOR
Promer cu tratamento di e caso, abogado mr. R.Marchena a bisa Hof cu e ta protesta contra e traductor Chines cu a bin pa traduci pa su cliente Chines Z.X. E abogado a bisa cu e traductor Chines tabata presente dia di e incidente y e ta forma parti di e otro partido.
Hof a papia cu e traductor Chines, kende a admiti cu e tabata presente ora e incidente a sosode pero cu esey no tin nada di haci cu su trabao. El a bisa cu e ta trahando cu Corte pa mas di 10 aña.
Hof a pospone e caso un rato pa evalua. E tres Huesnan cu ta forma Hof a bay reuni nan so y despues di un rato nan a bolbe.
Hof a bisa cu e ta aproba e peticion di abogado pa no laga e traductor Chines traduci pa Z.X. Hof ta haya cu e traductor tabata presente dia di e incidente, dia 30 Juni 2021, caminda Z.X. lo a agredi un hende Chines den un reunion na Chines Club cu un chapi.
CASO POSPONI
Hof a dicidi cu ta pospone e caso pa dia 22 Mei 2026 pa 8.30 di mainta. Entretanto lo haci e tramitenan necesario pa via Hulanda, haya un traductor Chines. E ora ey e traductor lo haci traduccion via video conference cu Hulanda.
