ORANJESTAD – Awe mainta, Corte di Husticia a trata e caso penal cu Ministerio Publico a cuminsa contra e homber Z.T.(20) di Hulanda, biba na Aruba. E ta wordo acusa cu riba 9 Mei 2024, el a purba mata e homber E. Tambe ta acusa Z.T. di tabatin un revolver.
SOLO DI PUEBLO por a compronde cu Hues a pospone e caso pa laga haci investigacion di kende e DNA cu a haya riba e revolver ta.
INVESTIGACION NA HULANDA RIBA REVOLVER
Hues a bisa cu na December 2023, a pospone tratamento di e caso pa laga Instituto Forence na Hulanda haci investigacion riba e revolver pa mira si ta haya DNA. Hues a bisa tambe cu e momento ey abogadonan mr. de Kort y mr. Ras di Z.T., a pidi pa scucha e victima E., den Corte como testigo. E peticion aki a keda honra door di Hues.
E victima E. tabata presenta den sala di Corte. Hues a pidi’e pa e sali y te ora cu e mester wordo interoga, e lo wordo yama pa drenta sala bek. Despues cu E. a sali, Hues a bisa cu e resultado di DNA ta mustra cu ta di un persona pero no sa kende. Hues a puntra si lo mester tuma muestra di Z.T. pa laga Instituto Forence na Hulanda (NFI) determina si e tabatin e arma. Hues a puntra Fiscal su opinion.
Fiscal a bisa Hues cu e investigacion ta mustra cu tin indicacion di un persona y tambe di un otro persona. Fiscal a splica cu el a puntra NFI na Hulanda, cuanto tempo lo dura pa haci investigacion. Nan bisa cu 4 siman ora haya e muestra.
Fiscal ta di opinion cu lo mester haya muestra di sospechoso Z.T. Fiscal a sigui bisa cu tambe e kier si e testigo E. kier coopera pa duna muestra. Sino e ta pidi Hues pa ordena E. pa duna muestra.
ABOGADO
Hues a puntra Z.T. si e tabatin e revolver den su man. Ta asina cu Z.T. ta para riba cu e no a mishi cu e revolver cu lo a wordo usa pa tira. Abogado mr. Ras a reacciona cu na Augustus 2024, a tuma muestra di Z.T. pero a dura hopi promer cu esaki a yega NFI. E abogado a bisa cu e huls di revolver tambe lo tin DNA. El a bisa cu tabatin un luchamento entre Z.T. y E. E ta puntra si ta asina necesario pa haci investigacion.
FISCAL
Fiscal a remarca cu despues di e luchamento, E. mes a coy e revolver y a tira cu esaki, pues no ta nada straño cu lo tin su DNA riba e revolver. Fiscal ta insisti pa laga tuma muestra pa asina NFI haci investigacion di DNA.
HUES A ORDENA PA HACI INVESTIGACION
Hues a pospone e caso un rato pa e bay evalua. Ora Hues a bolbe den sala di Corte, el a bisa cu e ta haya necesario pa tin DNA di e sospechoso y e testigo pa asina haya sa kende tabatin e arma. El a dicidi cu ta manda e caso pa Hues Comisario pa ordena E. pa duna muestra pa haci investigacion di DNA. Hues ta haya cu ora tin resultado di NFI, lo bay scucha E. como testigo. Hues a propone 28 Mei pa 1.30 di merdia lo bay sigui cu e caso.
Hues a yama E. pa bay den sala di Corte y a puntr’e si e ta dispuesto pa duna muestra pa laga investiga DNA. E. a bisa cu e ta dispuesto. Esey ta nifica cu muestra di e victima E. y e sospechoso T.Z. lo wordo manda NFI Hulanda pa investigacion.
