Den un investigacion haci dor di polisnan Hulandes, e caso conoci como “Caso di polis Vos” ta bolbe den atencion publico dia 8 di december, revelando un panorama di soborno y corupcion entre polis y medionan di comunicacion.
E caso ta trata di acusacionnan di soborno na agente di polis pa facilita conexion di radio di prensa na e red di radio di polis. Un grupo spesial prominente di polis hulandes a hasi y guia e investigacion, cu a dal un buelta significante riba 22 di maart 2023 cu e detencion di un ofisial di polis di rango halto, polis Vos.
Durante e buskeda na e residencia di Vos, autoridadnan a descubri un serie di aparato electronico y laptop perteneciendo na periodistanan, conecta na un red di prensa extenso. Entre e sospechosonan ta cinco reporteronan, incluyendo e principal Nelson Speed Andrade y Brian Koolman di 24ora, kendenan recientemente a wordo interoga pa e hues comisario.
Ministerio Publico ta sostene cu reporteronan tabata soborna e polis pa haña acceso privilegia na combersacionnan confidensial, revelando un skema di corupcion cu a sacudi e fundeshi di integridad den medionan di comunicación y aplicacion di ley.
E fecha clave di 8 di december ta marca e presentacion oficial di e caso dilanti di e hues penal di promer instancia. E desicion cu resulta di e caso lo determina si e polis Vos, lo keda liber of lo keda den prizon. Fuentenan ta indica cu e prolongacion di detencion pa nuebe luna ta sugeri e magnitud y seriedad di e caso.
SOLO DI PUEBLO lo sigui informa segun ora e desaroyonan den e caso scandaloso di corupcion keda presenta dilanti hues, unda lo por sali hopi informacion di e caso.
Mester remarca cu segun fuentenan a informa, durante interogacion cu a tuma lugar, varios sospechoso a keda sin contesta preguntanan di husticia of a contesta masha tiki.
