Cost controller Micheal Koolman a cera wowo y permiti bagamunderia
Tur documento ta den man di autoridad. E estafa den RDA ta un hecho. No tin ningun duda cu tin hendenan a abusa di nan funccion y confiansa y enbes di a traha como cost controller pa RDA, a bay over na yuda horta placa di RDA den dia cla.
Conclucionnan ta skirbi den rapport forensico. Nos ta trece un ehempel dilanti; Un generator tabata wordo gehuur pa e suma di 26 mil florin pa luna. Despues di 12 luna, e generator su prijs a baha y a bira 11 mil florin pa luna, “e mes generator”. Notabel ta cu na Juli 2019, otro compania ta tuma over y e prijs pa e mes generator a bira 23 mil florin pa luna.
Esaki ta indicacion serio cu no tabatin ningun sorto di cost control den projecto di Algen. E contract entre RDA cu Quest Consultancy tambe ta otro asunto dudoso, unda tabatin un cobransa halto, sin ningun sorto di back up. Tur backup a bay mondeling.
Ademas, kico e projecto di Algen lo a juda? Unda su estudio di factibilidad ta? Of e tabata mas bien un projecto pa horta placa na forma camufla?
Algun testigo a bisa cu nan kier a traha pilder di Algen pa bende cu botica, pasobra Algen ta juda imuun. Pues, RDA kier a bira un laboratorio medico pa traha pilder? Of ta otro pilder di droga nan kier a traha den laboratorio? Y pesey mester tabatin asina tabato seguridad?
Ken tur ta den e wega aki? Micheal Koolman lo bay bira un di e prome sospechosonan cu lo mester rindi cuenta. No solamente riba su propio contract, cual no tabatin ningun documentacion, time sheets, y nada nada nada! Pero tambe e mester bay rindi cuenta na ki sorto di cost control el’a haci y husticia mester saca afor si e tambe a hunga un rol den e schema di ladronicia. Colmo de los colmos ta cu apesar di tur e bainanan cu e ta hinca aden, keto bay e ta trahando na RDA, comosifuera e “no a kibra un koppi”. Who is fooling who? Ta ken tin man poni riba su cabes?
Testigonan cu a cuminza bin dilanti ta bisando cu nan a mira un link masha serca entre un compania di security, cu Micheal Koolman y cu Franci. Ta kickbacks lo tin na gran cantidad?
Na December 2017, a paga na security un suma di 41 mil florin, pa cuida dos container di Algen.
E cosnan aki no por keda hinca den lachi. Ta urgi husticia pa sigui nan investigacion y busca tur e sospechosonan den e caso grandi aki di corupcion masal na RDA.
