Despues di dos aña cu Ministerio Publico a anuncia cu tin un caso nobo, “Flamingo”, parce cu e caso a muri un morto natural.
Esey nos por conclui despues cu Huez Comisario a manda un kaboom pa Ministerio Publico.
POLIS A HACI DENUNCIA:
Na aña 2020, Ministerio Publico a bisa cu nan a start un investigacion Flamingo, basa riba denuncia haci dor di KPA contra ex minister Otmar Oduber. Awor ta bin sali na cla, cu e denuncia a wordo haci dor di un departamento den KPA, esta Bureau Crimineel Inlichtingen. Kico te trabao di e departamento aki? Nan ta un team di polis cu ta tene nan mes bezig cu acumula “informacion” combina cu poco spionahe y agentenan secreto cu ta scucha y traha rapport.
Pues, BCI a entrega un keho di loke nan a “tende”, of informacion cu nan a acumula.
Den e caso unda mester a husga si ta prolonga e detencion di Otmar Oduber, huez comisario a bisa cu e carta di BCI, no ta contene ningun prueba. Ni BCI a entrega prueba pa nan storia, ni OM a pone algun hayazgo, unda por comproba cu e storia tin base.
Pues, huez comisario no por a prolonga e detencion di Oduber, pasobra simplemente bisa: no tin nada!
SOLO DI PUEBLO a keda asombra di e desaroyo aki, pasobra tanto cu a papia di Caso Flamingo, pa bin compronde awor cu el’a muri morto natural?
Mester tene cuenta cu e caso ta keto bay den investigacion, pero compara cu e caso Avesturs di Benny Sevinger, por corda cu Benny a keda 63 dia cera, pasobra tabatin hopi pruebanan contundente den su contra, of alomenos hopi cosnan cu e mester a contesta.
Remarcabel ta cu a overhoor Otmar Oduber 7 ves, y tur biaha tabata bay riba e denuncia di e spiritonan di Marisol Lopes Tromp.
Ningun biaha a ni sikiera overhoor Otmar e riba asunto di tereno. Tur esaki ta skirbi den e desicion di Huez Comisario.
Hasta riba e spiritonan di Marisol, huez comisario a bisa cu no tin delito diparti Otmar Oduber.
