ORANJESTAD – Procurador General Deutekom a bisa: “Ibis ta un caso hopi serio y ta haya cu mester haya Paul Croes culpabel.”
E la mustra riba e impacto cu e caso IBIS tin riba e comunidad di Aruba. Caso Ibis ta envolvi 30 persona.
Segun Procurador General, Paul Croes a actua corupto y tabata tin un grupo di persona cu e tabata traha cun’e.
Segun Procurador General “DPL no por a haci su trabou bon, pasobra minister tabata tuma decision. Dimas no por a cumpli cu su maneho, pasobra minister tambe tabata meti. Paul Croes tabata responsabel pa labor y a viola e maneho di labor.”
Den e constitucion di nos pais ta para bon cla kiko un minister por haci y tambe kiko e no por haci. Paul Croes a huramenta dilanti Gobernador cu e no lo tuma nada di regalo for di niun persona pa haci fabor. Paul a wordo cumpra na gran escala.
Paul Croes a lanta e fundacion Excelence y tabata ricibi donacionnan for di hendenan cu tabata tin mester di permiso of dispensacion pa trahadonan di exterior.
Tin 11 caso caminda tin prueba cu companianan cu a paga of a duna Paul Croes regalo, a cambio di reglamento di permiso of dispensacion, esaki pa asina nan haya hende di exterior pa traha pa nan.
DPL tabata hiba un maneho pa percura pa nos hendenan local haya of tin trabou y pa por a emplea un persona di exterior nan mester haci un peticion. Paul Croes tabata haya placa for di tramitadornan di permiso, kendenan tabata regla permiso pa trahadonan di exterior. Nan tabata cobra y paga Paul Croes.
Tambe a menciona supermercadonan Chines cu a haci un of mas peticion pa permiso y cu Sr. Paul Croes a bay na e supermercadonan aki pa haya bebidanan a cambio. Paul a dispensa permisonan cu DPL a desaproba. Tambe tin un combersacionnan cu a wordo scucha, unda Paul Croes ta papia cu e comerciantenan pa sea placa of bebidanan alcoholico, a cambio e la priminti nan di regla permiso pa e extranheronan.
Simon cu tabata traha pa chinesnan a declara cu e tabata yama Paul pa regla permisonan y cu e tabata percura pa e chinesnan duna cahanan di alcohol y placa pa Paul su campanja.
Robbio Di Vecchia a cumpra Paul Croes, door di ofrece airconan. Den corte di prome instancia, Di Vecchia a wordo declara liber, pero Procurador General ta hay’e culpabel. E la mustra cu Di Vecchia mes a papia cu e tin un ingeniero tecnico di exterior cu mester haya permiso. E ta haya cu e combersacion entre Paul y Di Vecchia ta mustra cu e papiamento tocante airco ta relaciona cu e permiso pa su ingeniero tecnico.
Tambe mustra cu ta Excelence a paga pa e arico caminda Di Vecchia a duna un discuento di mas di 2 mil florin. Procurador General ta exigi 40 ora di trabou comunitario, 2 siman di castigo di prison condicional y 2 aña di prueba of 20 dia di prison.
Martinus tabata tin yamadanan telefonicio relaciona cu cumpramento di caarchinan pa e Concierto di Speranza di AVP y a papia tambe di permiso, a pidi pa declara su Martinus liber.
Procurado General a pidi pa condena sr. Wever cu 5 mil florin di cual 2500 florin ta condicional y tambe cu 3 aña di prueba. Wever a haci donacion na Excelence. Wever a haci esaki pasobra e tabata tin mester di permiso pa su trahadonan di exterior. Procurado General ta haya cu e la paga pa asina por ta sigur cu Paul lo bay yuda cu esaki.
Tambe tabatin companianan cu tabata prepara permiso pa extranheronan caminda ta cobra y paga Paul Croes.
Companianan Bashaca y Ranger Security tabata haci esaki via Feliciana. Autoridad a haya durante un entrada hudicial na cas di Feliciana, envelopnan cu sumanan di placa pa Paul Croes cu ta varia entre 1500 pa 3 mil tur pa reglamento di permiso.
