E caso Kukwisa cu ta bao investigacion ta draai riba e hecho di corupcion pa cumpra voto pa politico Marisol Lopes Tromp. Den su declaracion dilanti landsrecherche Marisol a nenga di bisa pueblo ( den transparencia!) ta bao di cual status el’a acudi na landsrecherche.
SOLO DI PUEBLO por segura su lectornan, cu si Marisol tabata testigo, lo el’a bisa publicamente. Sinembargo e scondemento di no bisa ta bao cual status el’a acudi, ta nifica nada otro cu e ta sospechoso den e caso.
Ora cu SOLO DI PUEBLO a bay profundisa un poco mas den e caso, nos a bin compronde cu e caso ta draai rond di promesa di campaña cu a yega te na cumpramento di voto.
Pa esaki tin cierto testigonan clave cu a acudi na polis pa haci e denuncia unda tabatin pruebanan concreto y serio, sino lo no a start un investigacion.
Manera nos a splica, tin un violacion di maneho. Aki ta trata di terenonan masha grandi mes, di 30.000 m2, 28.000 m2 y 26.000 m2, cual maneho ta bisa bon cla cu no ta duna tereno asina grandi mas. Hopi hende ta tuma e terenonan aki, sin planta nada. Nan ta traha un cas di palo y ta asina ta haciele un rancho.
E maneho cu a wordo cambia bao di Otmar Oduber, a bisa claramente cu huurgrond ta wordo duna solamente na grandura di 500 m2 te cu 2000 m2, asina mas hende por bini na remarke.
Pa bini na remarke di un tereno di 30.000m2, bo mester tin un plan financiero, y mester ta un industria cu realmente tin e capital y por proba cu nan lo usa full e tereno. Pues, a haci’ele mas complica pa duna tereno grandi.
Violando e maneho, Marisol a haci y deshaci den tempo cu e tabata minister, segun nos fuente.
Tin mas sospechoso tambe cu lo wordo interoga den e caso aki, unda tur a forma parti di un red pa haya tereno, contra tur maneho existente.
Ora un persona acudi na landsrecheche pa dos ves, y acudi pa 7 ora largo, y djey nenga prensa di bisa den ki status el’a bay, ta haci tur rumor mas fuerte ainda.
Marisol ta un sospechoso, mientras e no proba lo contrario. E investigacion lo continua, pasobra tin mas persona cu por a copera cu Marisol.
Lamentabel lo ta si Marisol laba man y tira culpa riba otro, unda otro lo mester keda frega awor.
E caso di corupcion pa cumpramento di voto lo sigui, ya cu landsrecherche ta basta druk.
