E caso penal contra e cuater periodistanan Richard Lacle, Brian Koolman, Norben Giel y Nelson Cabral de Andrade (Speed), ta bay Corte Superior.

   SOLO DI PUEBLO por a compronde cu Ministerio Publico no ta di acuerdo cu e sentencia y a apela.

   Hues den su sentencia na December 2024, a declara Richard Lacle, Brian Koolman, Norben Giel y Speed liber di e acusacion di a forma parti di un organizacion criminal. Hues ta haya cu no tin suficiente prueba. Hues a sigui bisa cu Speed, Giel y Lacle ta culpable di a cumpra Vos. Hues ta haya proba cu Speed, Giel y Lacle a paga Vos. Cada un a haci’e na nan manera. Hues a bisa cu e ta haya e declaracion di Vos confiabel. Na opinion di Hues, no ta esey so. E declaracion di Vos, ta wordo confirma door di e chatnan riba whatsapp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.

   Hues ta haya tur cuater periodista culpable cu Vos a viola su obligacion di comparti informacionnan secreto di Polis. Hues a bisa cu Vos no a haci’e su so. E acusadonan a yuda door di duna diferente laptop, facilita aparato wifi, instalacion di cierto apps pa asina haya tur informacion for di radio di Polis. Hues ta haya cu cada un a haci aporte significante den esaki.

LIBERTAD DI PRENSA TIN LIMITE

   Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta wordo determina pa ley.

   Hues a enfatisa cu un periodista no por haci delito pa haya informacion.

FISCAL A APELA SENTENCIA

   Ta asina cu Fiscal a exigi 2 aña di prison pa Speed y a exigi pa detencion di biaha ora Hues dicta sentencia. Fiscal a mustra cu Speed, apesar di a wordo condena pa un caso similar, a bolbe haci e mesun delito y den su periodo di prueba.

Fiscal a exigi 18 luna di prison di cual 8 luna ta condicional pa Giel y Lacle y cu 3 aña di prueba. Fiscal a exigi 6 luna di prison condicional pa Koolman cu 3 aña di prueba.

   Hues a condena Lacle y Giel na 240 ora di trabao pa comunidad y si no cumpli cu esaki, lo mester bay 120 dia sera den KIA. Tambe Hues a condena Lacle y Giel na 12 luna di prison condicional cu 3 aña di prueba. Esey ta nifica cu si den e periodo di 3 aña nan haci algo contra ley, nan lo por haya e 12 luna di prison riba e castigo cu nan lo haya pa e delito cu nan a haci.

   Hues a condena Speed na 18 luna di prison di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna sera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa un condena di e mesun delito aki cu el a yega di haci den pasado.

   Hues a condena Koolman na 150 ora di trabao pa comunidad y si e no cumpli cu esaki, e lo mester bay sera 75 dia di prison. Tambe un castigo condicional di 3 luna di prison cu 3 aña di prueba.

CASO TA BAY CORTE SUPERIOR