E caso penal di corupcion y soborno contra e sospechoso oficial di husticia Speed Andrade no a continua dialuna dia 24 di Juni 2024 y a wordo posponi.
Segun informe ricibi ta bisa cu e caso a keda posponi pa fin di September 2024.
Investigacion di Solo di Pueblo ta indica cu e caso a keda posponi, pasobra e abogado di Speed Andrade, Sra. Doris Canwood, lo no kier a hasi uso di ningun oportunidad di hasi mas investigacion of pidi testigo. Pues el’a informa corte cu di banda di e sospechoso oficial, no tin necesidad pa ningun extra testigo of documento.
Pe motibo ey e caso awor a pasa pa otro fecha. Segun fuentenan na altura a menciona cu e ta poni pa wordo trata na September proximo.
E caso ta bay riba corupcion y soborno contra Polis Vos cu ya caba a wordo sentencia na 1 aña y mei di castigo.
Ministerio publico no ta di acuerdo cu e sentencia contra polis Vos, y a bay den beroep.
E acusacionnan ta grave contra Speed Andrade y otronan.
Den caso di Speed Andrade e ta mas grave aun, pasobra Speed Andrade a bira un recidivista, pues un persona cu ta un convicto oficial, pues cu tin un sentencia di hues y cu ta ripiti e mes delito.
Ora cu ta trata di un recidivista, huesnan ta baha mas pisa, pasobra ya el’a wordo adverti caba den un caso anterior y a awor a hasi mescos.
Por compronde cu e dosier di Speed tin como 2000 pagina di chats, y 9500 mensahe secreto di polis. Tin como 200 pagina di conversacion.
Tur informacionnan secreto di Cuerpo Policial tabata yega directo na Speed, ken na su turno tabata paga e polis na un manera of otro.
Polis Vos a declara cu na dos ves Andrade a ofrece 1000 y 1500 florin pe haya e radio di polis.
Na juli 2019 Speed Andrade a wordo condena pa corte na 240 hora di trabao pa comunidad, cual te cu recien e tabata acudi na Fundacion Luna pa cuida e cachonan.
Den e caso ey un otro polis di faam R. a perde trabao, y a sufri e consequencia di a deal cu Speed Andrade. Na 2019 e testigo primordial tabata Marko Espinoza kende a basha abao dilanti recherche y a admiti y conta precies con e radio di polis tabata move. Espinoza tambe a wordo castiga y sentencia pa hues na 2019.
Na September venidero mester observa si Speed Andrade lo bay tambe cu su bocon grandi dilanti hues y grita hues manera ta su estilo di hasi manera shishi, pa insulta, lastra, y instiga tur hende cu e tin rabia riba nan.
E ta manda ministernan pa sera “snuit”, awor e tin oportunidad tambe pa hasi mescos dilanti hues y manda hues cera “snuit”. Na september lo wak ken ta cera snuit di ken.
Tabata na Maart 2023 cu recherche a haci inval den cas di e polis menciona y a haya varios laptop conecta.
