E hombernan W.E. (18) y R.M.B-A (21), a presenta dilanti Hues pa scucha nan castigo di e caso penal cu Ministerio Publico a cuminsa contra nan. Hues ta haya nan culpabel di a haci atraco arma riba un pareha turista riba 3 September 2024.
SOLO DI PUEBLO por a compronde cu Hues a baha e castigo cu Fiscal a exigi pa e hombernan W.E. y R.M.B-A.
2 Y 3 AÑA DI PRISON EXIGI
Luna pasa tratamento di e caso a tuma lugar caminda Fiscal a bisa Hues cu e ta haya cu conhuntamente W.E. y R.M.B.A. a haci e atraco cu violencia riba e pareaha turista. El a sigui bisa cu tin imagen di camera di seguridad, caminda ta mira tres homber y tambe tin declaracion di testigo cu ta bisa cu 3 homber a haci e atraco. Fiscal ta haya hopi serio cu a atraca e pareha turista. El a sigui bisa cu ta un hecho cu e caso aki a haya hopi atencion den prensa. Esaki a conmove comunidad. Na opinion di Fiscal, ta parce cu e dos acusadonan tabata droga y tabata pensa solamente riba nan mes. Fiscal a tuma nan na malo pa loke nan a haci.
Pa cu e castigo, Fiscal a bisa cu e ta tene cuenta cu W.E. tabata 17 aña ora el a haci e atraco y tabatin casonan habri ainda na Ministerio Publico. Fiscal ta haya cu tanto W.E. como R.M.B-A. mester di guia di Reclasering, manera nan mes a pidi. Fiscal a exigi pa W.E. 24 luna di prison di cual 6 luna ta condicional y cu 2 aña prueba, bou guia di Reclasering. Pa R.M.B-A., Fiscal a exigi 3 aña di prison di cual 6 luna ta condicional cu 3 aña di prueba y bou guia di Reclasering.
HUES A BAHA CASTIGO
Hues a bisa cu e ta haya legalmente proba cu W.E. y R.M.B-A. a haci e atraco arma riba e pareha turista. Pa cu e castigo, Hues a tene cuenta cu e tempo ey W.E. tabatin 17 aña y mester usa e ley hubenil. Hues a condena W.E. na 1 aña y 6 luna di prison di cual 6 luna ta condicional. E 6 luna condicional ta cu 2 aña di prueba y bou guia di Reclasering. Hues a condena R.M.B-A na 1 aña y 7 luna di prison di cual 6 luna ta condicional. E 6 luna condicional ta cu 2 aña di prueba y bou guia di Reclasering.
