Awe mainta Hues a dicta sentencia den e caso penal cu Ministerio Publico a cuminsa contra e hombernan D.R.A.(29) y R.D.P.(28) y e damanan L.T.(23) y K.D.(22).
SOLO DI PUEBLO por a compronde cu Hues ta haya e hombernan D.R.A. y R.D.P. culpabel di a pasa droga den KIA cu Drone y cu e damanan L.T. y K.D. ta culpabel di complecidad.
FISCAL A EXIGI CASTIGO COMBINA
Luna pasa tratamento di e caso a tuma lugar caminda Fiscal a bisa cu e ta haya e hombernan D.R.A. y R.D.P. culpabel di pasa droga den KIA via Drone y cu e damanan L.T. y K.D. ta complice. Fiscal a exigi pa D.R.A. y R.D.P., 18 luna di prison di cual 6 luna ta condicional cu 2 aña di prueba. Pa e damanan L.T. y K.D., Fiscal a exigi 360 dia di prison di cual 258 dia ta condicional. Pa tur cuater, Fiscal a pone e condicion cu durante e tempo di prueba nan ta cay bou guia di Reclasering.
HUES A DICTA SENTENCIA
Hues a bisa cu e ta haya cu D.R.A. y R.D.P. ta culpabel di pasa droga cu Drone den KIA. Hues ta haya cu e damanan L.T. y K.D. ta culpabel di complicidad o sea a yuda. Hues a mustra cu tin combersacion via whatsapp entre e parehanan caminda claramente e damanan sa cu cosnan ilegal tabata tuma lugar.
CASTIGO COMBINA
Pa cu e castigo, Hues a bisa cu e ta tene cuenta cu a usa Drone pa pasa droga den KIA. Hues a bisa cu ta conoci cu droga ta malo pa salud di hende y ta causa criminalidad. Hues ta haya cu loke ta haci e caso mas serio ta e hecho cu a trafica droga den KIA.
Hues a sigui bisa cu e ta tene cuenta cu orientacion di castigonan pa casonan similar. Hues a condena e hombernan D.R.A. y R.D.P. na 18 luna di prison, di cual 6 luna ta condicional cu 2 aña di prueba. Hues a ordena cu durante e periodo di prueba, nan ta cay bou guia di Reclasering. Hues a condena e damanan L.T. y K.D. na 9 luna di prison di cual 6 luna ta condicional cu 2 aña di prueba y cu nan tambe ta cay bou guia di Reclasering.
