ORANJESTAD – Corte di Husticia a trata e caso penal cu Ministerio Publico a cuminsa contra e homber B. (64). Tratamento di e caso a dura largo caminda B. tabata desmenti pero Hues a confront’e cu resultado di DNA cu ta mustra cu ta e.
SOLO DI PUEBLO por a compronde cu Fiscal a exigi 3 aña y 6 luna di prison y cu pa 6 aña ta prohibi B. haci masashi. Hues no a sigui Fiscal y a condena B. na 3 aña di prison di cual 1 aña ta condicional y no prohibicion di practica masashi.
Fiscal a acusa B. di a mishi y viola e dama S. durante cu e tabata haci masashi riba 10 Juni 2023. Fiscal a sigui bisa cu ta acusa B. tambe cu na Juli 2023 a mishi cu e homber T. durante cu e tabata haci masashi.
VIOLACION Y MISHIMENTO
Hues a mustra cu dia 10 Juni 2023, B. a mishi y viola e dama S. Na Juli 2023, el a mishi e homber T. Segun B. e no a forza y tampoco a actua contra voluntad di ningun di dos. El a bisa cu el a haci masashi relaciona cu un estudio.
Hues a bisa cu e dama S. a haci denuncia e mesun dia 10 Juni 2023. E tempo ey e tabatin 23 aña. El a splica na Polis cu un Spa na San Nicolas a invit’e pa modelo pa masashi. El a bisa cu e mester a kita tur su paña. El a bisa cu tabata filma e masashi pero na dado momento a para e filmamento y B. a mishi na su parti intimo. Segun B., e no a mishi na e parti intimo. Hues a bisa cu S. a bisa cu el a sera su pia pa B. no sigui mishi cu su parti intimo. E victima a declara na Polis cu despues e mester a drumi boca abao y B. a bay riba dje. Na dado momento B. a purba penetr’e di atras. El a pusha B. y un rato despues el a sinti cu B. a masturba riba su pia patras. Segun B., e no a bay riba S. y cu el a usa un azeta riba S. y no a masturba. B. a bisa Hues cu e ta sufri di prostata y no por masturba asina asina.
DNA TA MUSTRA RIBA E ACUSADO
Hues a mustra cu a haci investigacion riba S. y a manda muestra di DNA na Instituto Forence Hulanda (NFI). NFI a constata cu tabatin masturbacion y DNA di un homber. Despues a sigui investiga y a haya DNA di B. Hues a sigui bisa cu S. a sigui declara na Polis cu B. tabata masashi rond di su parti intimo. S. a cera su pianan y B. tabata purba mantene S. su pianan habri. Hues a mustra cu tin un testigo, homber R., cu a declara na Polis cu el a papia via video call cu S. y el a mira cu S. tabata yora y a bisa R. kico a pasa cun’e.
ACUSADO TA DESMENTI
Hues a bisa cu e homber T. a haci denuncia te na Februari 2025 di loke pasa na Juli 2023. E tambe a bisa cu tabata masashi di theoria. E mester a kita tur su paña y na cierto momento el a sinti cu B. tabata mishi cu su parti intimo y T. a para e masashi. Despues B. a bise cu no ta nada malo. B. a sigui masashi y ora T. a bira boca abao, B. a subi riba dje. Segun T., na dado momento el a sinti B. a masturba riba dje. B. a bisa Hues cu S. a busca apoyo di T. pa haci un denuncia contra dje. Hues a bisa cu con por si te na 2025, T. a haci denuncia. B. a splica Hues cu S. na December 2024 tabatin un reconciliacion cu e señora di B., cu ta wela di S. Despues S. a bay biba cerca di nan den un apartamento. Segun B. tur e cos aki ta un complot contra dje pasobra nan kier pa e kita for di su señora, pa S. haya herencia.
VICTIMA A EXPRESA SU MES
Un homber R. a presenta den Corte cu e demanda di su pareha S., victima di violacion. Hues a mustra cu e demanda no ta menciona suma. R. a bisa Hues cu su pareha S. no kier placa. E kier husticia. Ta asina cu e victima a manda un carta pa Hues, caminda e ta expresa su mes di tur loke el a pasa aden. Hues a bisa cu S. a expresa cu el a keda malo mentalmente. E ta sinti cu e no kier biba mas. E victima a expresa den e carta cu e kier bay psycologo of ayudo professional. E no ta come mes. El a bisa cu e ta sinti hopi malo pasobra su wela ta pareha di B.
FISCAL A BAHA PISA
Fiscal a bisa cu e dama S. no solamente a wordo mishi, sino tambe viola. Fiscal ta haya e declaracionnan di S., confiabel. El a mustra cu e declaracion di S. ta cuadra cu e declaracion di e testigo R. Tambe e raport di NFI ta confirma e declaracion di S. Na opinion di Fiscal, e homber T. su declaracion ta consistente cu declaracion di S. Tur cos ta mustra cu e declaracion di tur dos victima ta confiabel.
Fiscal a bisa cu tin resultado di NFI cu ta mustra cu a haya masturbacion di B. riba pia parti patras di S. Aunke cu B. ta desmenti, NFI a bisa cu a haya DNA di B. riba curpa di S.
Fiscal ta conclui cu B. a mishi y viola e dama S. Fiscal a bisa cu e homber T. na Februari 2025 a haci denuncia contra B. di a mishi cun’e na Juli 2023. Fiscal ta haya cu ta e mesun forma B. a haci. Fiscal a mustra cu segun ley, e solo hecho cu a mishi na parti intimo, ta wordo considera penetracion. Fiscal pa cu e castigo a bisa cu hechonan asina ta afecta e victima pa temponan largo. Fiscal a exigi 42 luna ( 3 aña y 6 luna) di prison y tambe a exigi pa prohibi B. pa eherce masashi pa 6 aña.
ABOGADO
Mr. Carlo a bisa Hues cu B. no tabatin e intension di abusa ni mishi. E abogado ta haya cu no tin prueba suficiente y cu mester declara B. liber. El a bisa cu si Hues ta haya cu tin indicacion, e abogado ta haya cu no tin prueba di sosten manera ley ta exigi y mester declara B. liber. Mr. Carlo a mustra cu S. a bisa cu di biaha despues di a sali for di B., el a yama R. Segun R., el a nota cu S. a keda yama y ora el a caba di traha, el a yama S. E abogado ta haya cu esaki ta mustra cu no tabatin urgencia. Na opinion di abogado, S. a declara na Polis cu B. a purba penetr’e y cu el a sinti cu B. a masturba riba dje. Abogado a mustra cu serca R., S. a bisa cu e ta kere cu B. a masturba y na Polis si S. ta duna declaracion hopi detaya. E abogado a bisa Hues cu e no ta haya declaracion di R. confiabel. R. lo a bisa cu el a mira S. su garganta cora. Esey lo ta cu B. lo a tene S. na su garganta. S. mes na Polis no a bisa nada di esaki. Esaki ta haci cu R. su declaracion no ta confiabel. E abogado a mustra cu S. y R. tin bon relacion cu otro. E abogado ta haya cu nan lo por a palabra con pa haci denuncia. Pa loke ta investigacion DNA, e abogado a bisa cu Fiscal ta bisa cu e masturbacion y DNA ta di B. E abogado a bisa cu segun conclusion di NFI ta papia cu e muestra por ta di B. El a mustra cu NFI a mustra cu tin DNA di dos persona S. y B. E abogado a mustra cu B. mes a bisa cu e no a usa mascara na cara y e tabata malo y por bien ta cu ta liquido di nanishi a cay riba S. El a mustra cu a dura basta tempo promer cu T. a haci denuncia. E abogado ta haya cu S. y T. lo por a palabra pa haci denuncia. Mr. Carlo a pidi Hues pa tene cuenta cu e situacion di salud di B. El a pidi Hues pa duna B. castigo igual cu loke e ta sera y un tempo di prueba.
Hues a sera e tratamento y a pospone e caso pa mas laat. El a bisa cu e ta bay studia e caso y ta dicta sentencia mas laat.
SENTENCIA
Hues ta haya e homber B. culpabel di a viola e dama S. y a mishi cu e homber T. Hues a condena B. na 3 aña di prison di cual 1 aña ta condicional cu tempo di prueba di 3 aña. Hues no a pone prohibicion di eherce trabao di masashi contra B.
