Un observacion alarmante a wordo haci riba e caya principal di Oranjestad, Caya Betico Croes, despues di e evento di “Ban Caya Bek” cu a tuma luga diabierna atardi/anochi. Aunke e evento a logra atrae un publico considerabel y tambe hopi turista riba e tram pa participa y disfruta di e bon ambiente musical, e dia despues, diasabra, e caya tabata completamente bashi.
E observacion aki ta lanta preguntanan serio tocante e efectividad di e evento. Un ciudadano a comenta, “Wak un caya aki, blo blo bashi,” señalando e contraste drastico entre e bida di diabierna atardi y e silencio di diasabra. Un otro ta sugeri cu e eventonan di AVP ta solamente un gastamento di placa, “AVP ta mira cu loke cu nan ta haci ta solamente gasta placa sin resultado.”
E intencion tras di e iniciativa di “Ban Caya Bek” tabata pa rebiba e caya y stimula economia local door di trece hende pa haci compras. Sinembargo, e realidad ta cu “caya ta mas bashi cu nunca,” segun un comentario, indicando cu e gastonan di e evento no ta traduci den un beneficio economico sostenibel pa e comerciantenan di Caya Betico Croes.
E contraste entre e exito momentaneo di diabierna y e fracaso total di diasabra ta subraya un problema mas profundo. E eventonan aki, pa asina yama, por crea un sensacion temporal di bida, pero no ta logra resolve e problema di e caya cu ta muri. E pregunta ta keda: con por trece bida bèk na Caya Betico Croes den un manera cu ta dura mas cu un anochi so?
