Oficina Central di Estadistica (CBS) a publica e cifranan mas reciente di e Indice di Prijs di Consumo (CPI), indicando cu pa e prome luna di aña 2026, prijsnan den consumo general a registra un caida di 0.3% compara cu e luna anterior.
Segun e informe oficial, e baha aki a wordo causa principalmente pa e sector di transporte y paña. Den e categoria di transporte, a nota un reduccion di 3.0%, specialmente debi na e caida den gasto di vehiculo personal. Di otro banda, e sector di paña y sapato a mira un bahada di 6.1%, loke a duna un alivio temporal na e consumo di e hogar Arubiano.
Inflacion anual ta keda positivo
Maske tawata tin un deflacion den e luna di januari mes, e inflacion total di e ultimo diesdos lunanan (januari 2025 te cu januari 2026) ta situa na 0.5%. Esaki ta un aumento leve den comparacion cu e mesun periodo di aña pasa, caminda e inflacion tawata 0.3%. E promedio anual di e ultimo 24 lunanan a keda stabil na 0.1%.
Movemento den sectornan
No tur cos a baha di prijs. E sector di mobilario a registra un aumento di 3.2%, pusha pa subidanan den prijs di aparato pa cas y herment pa hardin. Tambe, e sector di salud a subi cu 4.0%.
Pa loke ta trata alimentacion, e indice di cuminda na cas a subi cu 0.6%. Productonan manera pan y cereal tawata esnan cu a conoce e aumento mas fuerte den e categoria aki.
Energia y combustible
Un punto importante pa e comunidad ta e prijs di energia. Den januari, e indice di energia a baha cu 3.9%. Maske prijs di awa y electricidad a keda fiho, e prijs di gasolin a baha cu 4.7% y diesel a registra un caida di 7.6%. Esaki a contribui significante pa frena e inflacion general di e luna.
Bestaansminimum pa un famia
Pa loke ta trata e bestaansminimum, CBS ta calcula cu un famia di dos adulto y dos mucha mester di un entrada minimo di Afl. 5,529 pa luna pa cubri e necesidadnan basico. Esaki ta representa un rebaho di 8 florin den comparacion cu december 2025. Sinembargo, den un aña di tempo, e suma aki a aumenta cu 49 florin.
Pa un persona solo, e suma necesario pa biba ta wordo estima na Afl. 2,633 pa luna.
