Como parti di e Common Good Conference cu ta tuma luga e siman aki, diferente organisacion na Aruba ta mustra con nan ta traha diariamente pa fortalece impacto social y comunitario. Un di nan ta CEDE Aruba, un organisacion di desaroyo cu ta apoya fundacion- y iniciativanan comunitario cu enfoke riba impacto social, cultural y hubenil.
Segun su director, Daniel Tecklenborg, CEDE Aruba tin un rol di conector entre organisacion, fundacionnan y sector priva, facilitando colaboracion cu e meta pa amplia impacto positivo den comunidad.
“Nos ta invita tur hende cu kier haci algo bon pa comunidad pa bin, conecta y mira con nos por haci mas impacto hunto,” segun Daniel Tecklenborg.
Dia 29 di januari, CEDE Aruba lo ta presente durante e Common Good Expo na Renaissance Wind Creek Convention Center, caminda e comunidad lo por pasa, conoce e organisacion y topa hopi otro fundacion y iniciativa cu ta traha pa bon comun. E expo ta ofrece un plataforma pa intercambio di informacion, networking y inspiracion.
Durante e evento, cada bishitante lo haya informacion riba e servicio di CEDE Aruba, e trabou di otro fundacionnan, y oportunidad pa conecta cu iniciativanan cu por fortalece impacto social, tanto pa individuo como pa companianan cu kier contribui mas activamente na comunidad.
CEDE Aruba ta invita no solamente cada ciudadano, pero tambe companianan cu ta interesa den responsabilidad social y desaroyo sostenibel, pa explora con nan por mehora nan impacto y colabora cu iniciativa local.
“E expo ta un luga pa inspira, conecta y pone ideanan den accion na beneficio di nos comunidad,” segun Tecklenborg
Pa medio di e Common Good Expo y Conference, CEDE Aruba ta reafirma su compromiso pa crea conexionnan cu ta genera cambio positivo y duradero, invitando tur interesado pa forma parti di un movemento colectivo pa un Aruba mas fuerte y solidario.
