Corte a condena e hoben di 26 aña, Cedricson L., na un castigo di prison pa bida largo pa su envolvimento den dos asesinato, un intento di asesinato, intento di homicidio riba varios miembro di e ekipo di aresto (AT) y posesion di arma di candela. E castigo aki ta conforme e demanda di Ministerio Publico.
Den e investigacion “Bliksem”, a keda proba cu e sospechoso ta responsabel pa e asesinato na 2022 di Sidney Mercelina, kende tabata tin 27 aña e tempo ey. Mercelina a wordo raca cu bala ora e tabata sinta riba porch di su cas despues di un fiesta. Den e investigacion “Cloud”, a keda proba cu e sospechoso ta responsabel pa e asesinato na 2023 di Jorvien Lloyd, kende tabata tin 20 aña e tempo ey. Lloyd tambe a wordo raca cu bala dilanti su cas y falta poco pa un testigo tambe a perde su bida durante e atake ey. Tur dos asesinato a tuma luga den e bario di Seru Fortuna. Fuera cu testigonan a señala e sospechoso como e tirador, a resulta cu a uza e mesun arma di candela y un forma di opera similar den tur dos asesinato.
Ademas, a keda proba cu e sospechoso a purba mata cuater agente di polis durante su aresto na 2023. Ora cu e ekipo di aresto di polis a purba detene e sospechoso, e sospechoso a tira riba e polisnan tambe.
Pa medio di e forma extremadamente violento aki di mata dos persona hoben, e sospechoso a kita nan posesion mas valioso: nan bida. E asesinatonan aki a causa un schok den Seru Fortuna en particular y den henter Corsou en general. E sospechoso no a tuma responsabilidad pa su actonan, e fechonan por wordo atribui completamente na dje y e chens pa ripiticion ta wordo evalua como halto. Mirando tur esaki, e sociedad mester wordo proteha y p’esei e sospechoso mester wordo separa di sociedad pa un tempo largo. Pesey Corte ta considera cu un castigo di prison pa bida largo so ta apropia.
Band’i e castigo aki, a otorga compensacion pa daño na e famianan di e victimanan.
Tanto L. como Ministerio Publico tin e posibilidad pa apela den un plaso di dos siman.
