Caminda Envidia ta domina tur cos ta stanca.
Hopi biaha nos ta nota cu servicio den un Negoshi, of Oficina, of hasta den un Supermarket no ta funciona adecuadamente, pa motibo di Envidia.
Envidia no tin miedo di expresa su mes e ta sali pa dilanti sin hende ripara, pero esnan cu conoce su triki ta compronde mesora cu envidia ta presente.
Ta envidia a pone Cain mata Abel ( Genesis capitulo 4),
Envidia a pone Saul persigi David.
Envidia a pone cu Hose su rumannan a bende.
Por poco envidia a stroba David di vence Goliat, door cu su ruman gandi no kier pa e tabata presente.
Pa motibo di envidia Cristo Hesus a wordo entrega na Poncio Pilato.
Envidia ta aparece den matrimonio y den famia. Pasobra diabel tin tur sorto di disfras.
Envidia entre ruman carnal ta conoci, y envidia entre ruman spiritual tambe ta conoci.
Saul tabata envidia David pa e uncion y presencia di Dios cu tabatin riba David su bida.
Envidia por kibra un matrimonio.
Envidia ta causa division den Famia.
Envidia ta capas pa ocasiona morto.
Envidia ta caba cu relacion y bon amistad.
Pasobra caminda tin envidia y egoismo tin desorden y tur sorto di cos malo.( Santiago 3;16).
Ta motibo di envidia hende ta cana caminda di maldad y inmoralidad y bruheria pa otro.
Pasobra ningun hende por bay serca Dios y bisa Dios pa Dios haci malo cu su prohimo pe, pasobra Dios ta bisa stima bo prohimo manera bo mes. Y ora hende no por wordo satisface cu bondad nan ta busca caminda di maldad cual ta hiba na nan propio destruccion.
Envidia no ta paga, tur envidioso cu no a arepenti, y cambia nan manera di pensa y biba, a cay den nan mes trampa.
Loke ta sali for di hende , esey ta contamina hende. Pasobra for di paden, for di curason di hende, ta sali mal pensamento, fornicacion, ladronisia,matamento,hechonan di cudishiy maldad,tambe enganjo,sensualidad, Envidia, calumnia, orguyo y bobedad. Tur esaki ta sali for di paden y ta contamina hende.( Marco 7:20-23)
Envidia por yega asina leu cu un persona ta contrata of paga un hende pa mata su prohimo, pasobra envidia ta totalmente diabolico, no ta cos di haci wega cune, envidia ta destructivo.
Pesey tin hopi hende cu no por celebra victoria, ni tampoco crecemento di nan prohimo.
Pasobra nan deseo ta pa e persona ey semper keda bao di nan, semper e mester keda manera un esclavo, asina cu e cuminsa pensa di bay dilanti y tin e vision di locual Dios a bise pa haci,e ta wordo envidia, pasobra e a pensa na crece y no keda atras.
Ta ora victoria y crecemento berdadero bati na bo porta, bo ta sa ken berdaderamente ta bo hendenan, cu kier mira bo bay dilanti, especialmente coleganan cu no ta tuma liber dia di bo promocion, pero cu ta celebra cu bo di curason pasobra nan consenshi ta limpi.
Den Lucas 15:11-32 e ruman mayor no kier a celebra cu e ruman chikito a bin cas bek y drecha su bida, eynan nos ta mira envidia entre ruman.
Den Job 42:10 Dios a bisa Job pa haci oracion pa su amigonan cu tabata molestie durante su prueba, y despues cu Job a haci esey, Dios a restaura su bida por completo.
Hende Envidioso, lo no hereda e reino di Dios, no tin entrada na cielo pa nan ( Galationan 5:19-21).
Laga nos mantene nos bida, matrimonio, y famia leu for di envidia, laga e gracia di Dios goberna nos curason.
Sinceramente ,Pastor Marcel Balootje
