Reverendo Pastoor Jozef Pelc y Reverendo Diacono Michael Nicolaas, di Parokia Birgen di Fatima Dakota ta anuncia celebracion di Corpus Christi diadomingo awor 22 di juni 2025 cu un Santo Sacrificio di Misa Solem cuminsando pa 5’or di atardi. Invitacion ta bay na tur Parokiano di Dakota, y Gruponan di Oracion y Pueblo di Aruba en general pa asisti na e Santo Sacrificio di Misa. Pa 6.00 pm lo sigui cu un procesion di Curpa y Sanger di nos Señor Hesu – Cristo o sea Corpus Christi cu ta ilustra e presencia real di Cristo den Eucarestia. E ta un fiesta cu ta wordo celebra desde siglo XIII. Nos ta conmemora e institucion di e Santa Eucarestia ariba Diahuebs Santo y nos ta duna tributo solem di adoracion, amor y gratitud. E ta un fiesta hopi importante ya cu Eucarestia ta e regalo di mas grandi cu Dios a duna nos pasobra E tabata desea di keda cu nos, tambe despues di Su Ascencion na Shelo. E procesion Eucaristico lo pasa den cayanan di Dakota y bishitando 4 altar simbolisando 4 skinanan di mundo y lo para un momento pa resa, scucha lectura y ricibi bendicion. Cu un fe firme den Señor nos Dios, e Celebracion, lo tin un influencia positivo riba nos bida spiritual, social, cultural y politico. Lo reza Santo Rosario pa 4.15 pm. Boso presencia ta altamente aprecia.
