Despues di alrededor di dos aña sin por organisa un evento grandi, Centro di Bario Savaneta a sa di keda cu e ambiente y cu e programa varia pa atrae centenares di bishitante durante ful e dia.
E celebracion importante di nos isla no por pasa sin mas, e aña aki a parti e programa den tres parti. Un koffiemorgen, programa di entretenimento y weganan popular. E actividad tawata ful dia, di 9’or di mainta te cu 8’or di anochi.
Den un ambiente dushi un y tur cu tawata presente na Centro di Bario Savaneta por a disfruta di un dia yena cu diferente actividad. Grupo Samen Oud Savaneta a organisa un tremendo Koffiemorgen y asina a cuminsa e mainta den un ambiente ameno.
Despues di nos Himno a continua cu Caha di Orgel, Mi Amor, cu a deleita un y tur cu nan dushi musica. Durante dia nos a haya bishita di Candy Dancers y Dazzling Dancers. Tambe nos a haya un bunita presentacion di nos muchanan di bario, the Aruban Girls, cu nan mes a prepara un baile pa e dia aki. Tambe nos a ricibi Quilany Jansen, ganadora di un Canto pa Nos Himno y Bandera, Lizianne Webb y grupo di 4 cantante cu a canta un bunita potpourri. Un aplauso sigur pa nos muchanan! Tradicion Musical a toca parti atardi y Tipico Pegasaya a caba e anochi cu un tremendo presentacion.
No por a keda sin falta e weganan popular pa grandi y chikito cu a sa di atrae e publico entre otro: stoelendans, baile cu blaas, bula den saco, core cu tire y ranca cabuya.
