Staff Appreciation Week yena di motivacion, inspiracion y alegria
Recientemente a tuma luga HOH, LABHOH y Bloedbank su Staff Appreciation Week 2023 cual a culmina riba dia internacional di enfermeria. Un siman unda HOH, LABHOH y Bloedbank a para keto riba e tema “WE ARE ONE” cu e enfoke primordial riba teambuilding, motivacion y inspiracion. Pa lunanan largo un comishon di colega a traha duro tras di cortina pa hinca un programa den otro unda tabatin pa cada gusto algo. Un siman colorido unda e cara nan cu sonrisa di colega di departamentonan tabata resalta recordando un y tur cu tur persona den Hospital tin un tarea importante. Y ta culmina e siman cu dia di enfermeria poniendo riba e dia aki extra enfasis riba e importancia grandi cu cada profesional den enfermeria tin unda cu nan briyo nan ta aparece tur dia na e cama di nos pashentnan.
Dialuna mainta por a nota e diferencia di biaha momento cu yega trabou unda cu a yena e diferente edificionan cu blaas colorido y alabes coleganan tambe a bin bisti cu algo di color cu ta resalta celebracion. Mainta a start cu un mensahe virtual pa tur colega cu a representa e apertura oficial di e siman cu mensahe special di Hunta di Dretiva pa un y tur. Tambe mirando como organisacion nos enfoke ta hiba un bida saludabel a parti un “healthy snack” pa tur colega por a disfruta. Diamars tabatin oportunidad pa atende sesionnan di motivacion unda enfoke tabata “How to be your best self” presenta pa Johnny Boekhoudt y tambe “Soul energizer” presenta pa Mingli Chung.
Diaranson a hiba e tema di “feeling lucky” unda danki na partners cu s kere den nos a logra rifa 38 premio bou di tur colega. Danki na cada sponsor di curason pa nan regalo cu a haci nos coleganan contento, sea den forma di basket, dinner of lunch, perfume y mucho mas. Diahuebs tabata dia di “happy heart, happy belly and happy thoughts” unda a parti regalito y cupcake pa tur colega y alabes a duna nan un bes mas e oportunidad pa atende un sesion di motivacion. E biaha aki por a scohe entre e tema di “Emotional Intelligence” presenta pa Joanne Croes of sesion presenta pa Shanti cu a hiba e tema di “Mindfulness” Pues un dia super exitoso!
Diabierna a celebra den gran forma dia di enfermeria unda internacionalmente a pone enfasis riba “OUR NURSE. OUR FUTURE.” Enfermeria ta un trabou asina bunita cu ta rekeri un pasion y dedicacion inmenso y dia 12 di mei un bes mas a para keto riba esaki. Durante oranan di merdia a saca empleado di luna cual a keda den persona di Nurse Max Abecia di departamento di B3. Un persona cu ful e team semper por a conta riba dje, tambe amor pa su pashentnan y hopi curason pa su trabou.
A culmina e tremendo siman cu e “We are One Happy Hour” na Balashi Beer Gardens cual a start sali den oranan di atardi cu e dushi musica di Noush & the band” y tambe “Massive brassband”. A ricibi bishita di Minister di Salubridad, sr. Dangui Oduber, cual a hiba algun palabra na e team completo presente. Tambe di Hunta di Directiva, sr. Jacco Vroegop y sr. Gregory Croeze a pone enfasis riba e inspiracion cu cada colega ta pa nan y e importancia cu cada funcion tin pa asina brinda cuido di calidad na nos pashentnan y clientenan. A desvela e diseño cu Hospital Carnival Group lo bay cune den Carnaval 70 hunto cu TOB durante oranan di anochi. Pues un evento yena di alegria, sorpresa y baile.
Gradicimento special ta bay na e coleganan di comishon di e Staff Appreciation Week, esta Sheila Kelly, Mary- Jane Tromp, Vanessa Winterdal, Julie Malmberg, Rachelle Roos, Maysa Chalabi, Jessy Leon- Tromp y Charlaine Huntington. Y un bes mas danki di curason na cada sponsor cu un bes mas di un of otro manera a forma parti di nos Staff Appreciation Week!
