Tur aña riba e fecha di 23 di juni,mundialmente ta celebra e dia Olimpico. Alrededor di e fecha aki, tur comite Olimpico Nacional y instancianan deportivo rond di mundo ta organisa eventonan pa asina celebra e dia special aki, na unda Comite Olimpico Arubano hunto cu Ibisa y Aruba Bank ta organisa e “IBiSA Kids Run & Olympic Day Celebration 2025”. E aña aki, e celebracion a tuma luga diasabra dia 21, unda a cera e caminda di Vondellaan por completo pa asina permiti mas di 750 mucha di diferente scol y bario di tur nivel participa den e Ibisa Kids Run. E careda aki a bay hunto cu e celebracion Olimpico, unda a reparti certificado, haya oportunidad pa saca potret cu e antorcha y atletanan Olimpico y mucho mas. COA ta gradici e IBiSA y Aruba Bank pa un bes mas ta parti di e celebracion aki y comunidad di Aruba pa nan tremendo participacion.
