Diaranson nochi a tuma luga e cendemento di luz den conexion cu Dia Mundial di Autismo, un momento special di reflexion, consciencia y compromiso cu inclusion.
E anochi a cuminsa cu palabranan di Byron Lesire, kende a expresa su gratitud na Ministerio di Salubridad, Asuntonan Social, Cuido di Adultonan Mayor y Adiccion pa su sosten continuo y pa e bunita organisacion di e evento. Tambe el a pone enfasis riba e uzo di “silent applause”, un forma visual di mustra aprecio sin zonido, invitando tur presente pa participa den e gesto special aki.
Prome Minister Mike Eman a comparti su orguyo pa e trabou di e comision di autismo, resaltando e importancia di sigui traha hunto pa un comunidad mas inclusivo, unda tur persona, cu nan reto y talento, por sinti nan mes parti di sociedad.
Durante e evento, a anuncia cu ta den desaroyo un concepto di ley pa introduci sosten financiero pa famianan cu muchanan bou di 18 aña cu tin necesidadnan special. E iniciativa aki ta enfoca riba yuda cubri gastonan pa terapianan y cuido adicional, cu hopi biaha no ta cubri completo.
Gobierno ta comprometi pa sigui scucha e comunidad y brinda apoyo concreto na famianan cu mas mester di dje, cu speransa cu e ley aki lo ofrece un alivio real den futuro cercano.
Minister Mervin Wyatt-Ras a comparti un mensahe di compromiso y inclusion, enfatisando cu cada persona cu autismo tin talento unico y merece respet y aprecio. El a haci un yamada pa sigui traha hunto pa un comunidad mas inclusivo.
Den mesun contexto, Minister Wendrick Cicilia a enfatisa e importancia di sosten directo pa mehora y dignifica calidad di bida di muchanan y hobenan cu autismo. Tambe a anuncia un aporte financiero na Fundacion Autismo Aruba como muestra di apoyo concreto na e trabou esencial cu nan ta desempeña.
Sra. Carolina Thijsen-Span, presidente di Fundacion Autismo Aruba, a comparti un mensahe inspirador y realista. El a gradici e apoyo continuo di gobierno y comunidad, y a subraya cu autismo ta un responsabilidad comparti. Mundialmente entre 1% te 3% di poblacion ta autista, mientras cu diagnostico hopi biaha ta yega laat, limitando oportunidadnan di desaroyo.
Fundacion Autismo Aruba ta enfoca riba fortalecemento di sistema, creando conciencia y brindando herment na profesionalnan, educadornan y comunidad pa promove inclusion.
Pa cera e anochi, Kay Quantum, adulto autista y embahadora di fundacion, a presenta un poesia inspirador cu a resalta humanidad, resiliencia y balor di cada persona. Su mensahe a confirma e importancia di respet y inclusion pa tur hende, sin importa diferencia.
E anochi a sirbi como un recordatorio cu hunto nos tin e responsabilidad pa construi un Aruba unda tur persona ta aprecia, respeta y tin oportunidad pa biba un bida digno.
