Actualmente Oficina Central di Estadistica (CBS) ta haciendo e ultimo preparacionnan pa e censo economico “Economic Census 2023” cual ta un conteo di tur negoshinan y fundacionnan na Aruba, y lo tuma lugar entrante 14 di April te cu fin di Juni. En conexion cu esaki CBS ta publica awe un checklist di tur e informacion cu e censo ta pidi pa asina representante di e entidad tin disponible y asina haci e bishita di e encuestador mas efectivo posibel.
Pa e Economic Census 2023 encuestadornan asigna lo haya instruccion pa acerca tur entidad na unda un actividad economico ta tuma lugar. E encuestado lo puntra e respresentante di e entidad pa un cita pa haci e entrevista (preferiblemente den e mesun siman) of si ta posibel na e mesun momento di biaha. En principio e representante ta e persona encarga cu e parti financiero di e compania.
Den caso cu e establecimento ta fungi como un hoofdkantoor/oficina principal pa un compania cu diferente filiaal (sucursal di sosten), nos ta suplica amabelmente pa por tin e siguiente informacionnan disponibel pa cu e hoofdkantoor / oficina principal di un empresa y pa cada filiaal (sucursal di sosten) separa:
- E number di registracion na Camara di Comercio (KvK) y na Banco di Seguro Social (SVB) y e “persoonsnummer” di Departamento di Impuesto;
- E aña y luna exacto cu e instancia a bira activo;
- E cantidad di personanan trahando riba 1 di april 2023 y e cantidad di empleadonan trahando cu ta registra na SVB y ta riba payroll riba 1 di april 2023;
- E cantidad di propietario y miembronan di famia cu no ta riba payroll, trahando na e negoshi, instancia of fundacion riba 1 di april 2023;
Adicionalmente lo puntra pa cada empresa (no pa cada filiaal):
- E cantidad di vacaturanan
- E suma di salario paga na luna di maart 2023;
- E suma di salario paga na aña 2022;
- E suma total di benta pa aña 2020, 2021 y 2022.
- E porcentahe di benta obteni via online sales (website of medionan social)
- Porcentahe di benta atribui na turista
- E suma total di inversion haci den e ultimo 5 aña
Un copia di e checklist aki y tambe e cuestionario completo lo ta disponibel riba e website di CBS www.cbs.aw e dia cu e Economic Census 2023 inicia. Tur encuestador tambe lo tin un copia di checklist pa duna e representante ora di haci e bishita na e instancia. Naturalmente e datonan colecta lo wordo publica solamente den un forma agrega y CBS ta garantisa cu e privacidad di cada institucion ta wordo respeta manera ley ta stipula. Nos ta agradeci ya caba na tur instancia pa nan cooperacion.
