Riba diabierna 16 di October 2026, Centro di Bario Noord lo ta e punto di encuentro pa un dia yen di enseñansa, conciencia y participacion comunitario, den ocasion di Dia Mundial di Agricultura y Alimentacion. E actividadnan ta prepara pa muchanan, mayornan y famianan cu tin interes pa siña mas tocante agricultura, alimentacion y e importancia di siguridad di alimento.
E iniciativa ta enfatisa cu agricultura ta un parti importante di nos bida diario y manera cu nos por construi un futuro mas saludabel y sostenibel. Door di educa tanto nos muchanan como nos mayornan, nos por crea mas conciencia tocante di unda nos alimento ta bini y e importancia di tin acceso na alimento saludabel.
Workshop di Agricultura pa Muchanan
Durante mainta, muchanan entre 5 y 12 aña ta invita pa participa den un workshop educativo y interactivo. E actividad lo tuma luga di 9:00 or di mainta te 11:00 or di mainta, y ta ofrece e muchanan un oportunidad pa descubri nivel basico di plantamento di berdura y fruta.
Cu un contribucion di solamente Afl. 3,50 pa cada mucha, e workshop ta enfoca riba enseñansa di un manera practico y creativo. E muchanan lo por siña mas tocante e proceso di planta, crecemento y cuido di cultivo, mientras nan ta discubri e balor di agricultura y di produci nos propio alimento.
E tipo di experiencia por yuda planta e simianan di conciencia ambiental desde trempan di edad, mientras ta fortalece e curiosidad y e interes di muchanan pa naturalesa y alimentacion saludabel.
Workshop y Dialogo pa Mayornan
Atardi, e programa ta continua cu un Workshop y Dialogo pa Mayornan, cu lo tuma luga di 3:00 or t’e 5:00 or. E actividad ta un oportunidad pa mayornan tuma un momento pa reflexiona y informa nan mes mas bon tocante e significado di “Dia Mundial di Agricultura y Alimentacion.”
E participacion tin un contribucion di Afl. 15,00 pa cada mayor. E dialogo ta busca crea un espacio pa comparti conocimento, intercambia idea y aumenta conciencia tocante e rol cu cada persona y comunidad tin pa promove un sistema di alimentacion mas sigur y saludabel.
For di 10:00 AM or pa 2:00 PM comunidad di Aruba por bin discubri y disfruta di un variedad di mata, fruta, berdura y hopi mas, tur fresco y, naturalmente, “LOCAL”!
Hunto pa un futuro mas sigur y saludabel
E Dia Mundial di Agricultura y Alimentacion ta brinda un oportunidad pa henter famia participa den un experiencia educativo y significativo. Door di involucra tanto muchanan como mayornan,
e actividadnan ta invita nos comunidad pa pensa riba su importancia. E organisadornan ta haci unylamado na famianan pa bin participa, siña y comparti hunto. Hunto nos por planta e simianan pa un futuro mas sigur, saludabel y consciente.
Fecha: Diabierna 16 di October 2026
Lugar: Centro di Bario Noord
Workshop pa muchanan: 9:00 a.m. – 11:00 a.m. | Afl. 3,50
Workshop y dialogo pa mayornan: 3:00 p.m. – 5:00 p.m. | Afl. 15,00
