Den cuadro di luna di Conscientisacion mundial riba tema di Cancer di Boca di Matriz, Centro di Bario Noord ta anuncia oficialmente un charla educativo cu titulo “Conscientisacion pa Cancer di Boca di Matriz – Cuida bo salud!,” presenta pa Dokter Aveline Figaroa cu lo wordo organiza riba Diahuebs, 29 di januari 2026, for di 7:00 pm te cu 9:00 pm, na Centro di Bario Noord.
E iniciativa aki ta parti di e compromiso continuo di Centro di Bario Noord pa promove salud, bienestar y educacion preventivo den comunidad. Cancer di boca di matriz ta un di e tiponan di cancer cu por wordo preveni y trata cu exito si ta wordo detecta temprano. Pa esaki, conscientisacion y informacion ta esencial pa salba bida y fortalece comunidad.
Durante e charla, participante nan lo haya informacion importante riba kico cancer di boca di matriz ta, con e por afecta hende, cual ta e sintomanan mas comun, y con screening y control regular por haci un diferencia grandi. Tambe lo wordo enfatisa importancia di cuida bo propio salud, haci chequeo regular y busca informacion corecto for di profesionalnan di salud.
E evento ta habri pa tur hende di comunidad, sin ningun costo, y ta invita especialmente hende muhe, famianan, hoben y adulto mayor pa participa y haya sa mas riba e tema relevante aki. Centro di Bario Noord ta kere firme cu conocemento ta poder, y cu dor di educacion y dialogo habri, nos por reduci stigma y crea mas apertura pa conbersa riba salud di hende muhe.
“Cuida bo salud” no ta solamente un slogan, pero un yamada na accion pa tur miembro di comunidad. Dor di iniciativanan manera esaki, Centro di Bario Noord ta busca fortalece conexion entre comunidad y sector di salud, stimulando un cultura di prevencion y responsabilidad personal.
E charla lo tuma lugar na Centro di Bario Noord, un espacio central y accesibel pa comunidad, den un ambiente di respet, apoyo y compartimento di informacion. Pa hende nan cu ta desea mas informacion riba e evento, por tuma contacto via 568 2935.
Centro di Bario Noord ta invita tur hende pa marca e fecha den nan calendario y t’ey presente pa forma parti di e movemento di conscientisacion. Hunto nos por crea mas conocemento, mas conciencitacion y un comunidad mas fuerte y saludabel.
Wak pa bo t’ey – Noord Creciendo Hunto
