Ultimo lunanan, despues di pandemia, negoshi y consumidonan rond mundo, a haya nan mes obliga na haci adaptacion pa por nabega door di e retonan cu “supply chain” a trece cu ne, pues cu e demanda riba cierto producto ta mas halto cu e produccion, banda di scarsedad di barco pa por transporta e carga di un waf pa otro. For di palo pa biña, tur hende, di un manera of otro, ta sintiendo e impacto di e reto aki.
Actualmente tin un scarsedad enorme riba tur boter di glas mundialmente, cu ta impacta nos tambe di Brouwerij Nacional Balashi, cu ta produci, entre otro, e cerbes original Balashi, como tambe Chill, Magic Mango y Magic Orange. E impacto ta sinta na e realidad cu ta dificil pa haya boter color berde riba mercado internacional.
E reto di scarsedad di boter a bin net na momento cu e demanda pa e Balashi “tapa cora” a bira hopi mas grandi cu tur tempo. Comunidad a gusta e concepto nobo, e smaak perfectiona y refrescante di e cerbes fresco produci aki na Aruba mes. Pues, consumidornan ta haya nan mes confronta cu den supermercado no ta bende mucho pasobra ta teme pa e caba, of ta haya di tende cu e cerbes a caba.
Mirando cu no tin un fecha sigur di ki dia por yega na un cantidad di boter color berde atrobe y pa por sugui abastece e mercado creciendo di Balashi, a dicidi di añadi boter color bruin tambe den produccion. Pues e consumido lo por disfruta di e mesun cerbes, cu e mesun smaak procedente di e mesun tanki, emboteya den dos diferente color di boter pero cu e mesun tapadera color cora cu e mesun calidad.
Abo como consumido por yuda nos tambe den e causa aki, door di entrega bo boter di Balashi bek, despues di uzo, pa nos por recicl’e. Por entrega tur producto di Brouwerij Nacional Balashi na e planta mes situa na Balashi of na Tropical Bottling Carry-out & Drive-thru situa na L.G. Smith Blvd # 22 na Playa of tambe na Doormanstraat # 5 na San Nicolas. Ta paga 25 cen pa cada boter y 6 florin pa cada caha completo di 24 boter di cerbes.
Den caso cu no por yega eynan, cliente por manda mensahe via e sistema di whatsapp na number +297 5976533 y nan mes ta bin busca e boternan cerca bo.
