Diasabra den careda di 4’or di atardi, famia di Micheal Feliciana y George Faro “Goi” a bin hunto na lama un poco panort di Ritz Carlton.

  • Esaki tabata pa hunto nan recorda cu riba eb fecha 11 di juni 1992, den oranan di atardi e hobennan  Michael Feliciana di 19 aña y su amigo George ‘Goi’ Faro di 26 aña a subi boto bay pisca y a desaparece pa semper. E sitio unda e ceremonio a wordo teni, tabata exactamente e caminda unda nan a subi boto y nunca mas a regresa.

Un cantidad grandi miembronan di ambos famia a reuni na e hut caminda e dos hobennan e tempo ey sali.  Un Pastor a haci un ceremonia religioso na e sitio y despues bou lagrima varios miembro di  famia a hiba palabra, entre otro e yiu muher di Michael cu lamentabelmente nunca a conoce su tata, pa motibo cu na momento cu Michael a subi lama y no a regresa, su yiu muher tabata tin apenas 5 luna naci. For di potretnan y tambe locual famia a cont’e di su tata, ta e unico recuerdo cu e la lanta cu ne di su tata.

Riba un mesa nan a pone potret di Goi y Micheal, despues cu e ceremonia religioso a caba y famianan a caba di hiba palabra. Tur esnan presente a reuni canto di awa y a tira un flor den lama, pa asina recorda Michael y Goi.

Segun famia despues di nan desaparicion a sigui un temporada hopi duro pa ambos famia, Feliciana y Faro. Te awe ainda nan no sa kiko exactamente a pasa cu nan sernan keri. Ainda algun miembro di famia ta cargando un speransa cu un dia nan lo regresa. E trinta añanan cu a pasa tabata hopi duro pa ambos famia, especialmente e añanan mas recien di nan desaparicion.Famia a haya varios informacion pero sin resultado.

E dos hobennan Michael Feliciana y George Faro riba 11 di juni 1992 a sali den oranan di atardi den un boto di como 14 pia, pa bay pisca banda di Antilla, enberdad tabata tin testigo cu a miranan ta pisca eybanda basta cerca.

Segun famia nan no tabata mucho leu di costa y nan lugar di pisca tabata banda di Antilla. Nan a informa nan famia cu den careda di 8’or di anochi nan lo bolbe bek. Na momento cu 8’or a bati nan no a regresa y famia a nota cu tabata birando mas y mas laat, famia a bira nervioso y mesora a bati alarma. Hopi lihe e boto di polis a sali busca, pero no a topa cu nan.

E buskeda pa e dos hobennan aki tabata un di e buskedanan mas largo y grandi di e tempo ey na Aruba. A busca dianan largo, a haya cooperacion di Corsou, di Venezuela, Puerto Rico pero tur tabata sin resultado, e dos hobennan a desaparece pa semper.

Keda pendiente pa un programa extenso relaciona cu e desaparicion di Michael y Goi, varios miembro di famia lo conta con nan a experiencia e desaparacion di Michael y Goi y con nan bida a sigui despues di nan desaparicion, e programa lo wordo transmiti pronto ariba Canal 22

LEAVE A REPLY

Please enter your comment!
Please enter your name here