Den marco di e celebracion historico di 40 aña di Status Aparte di Aruba y 50 aña di Himno y Bandera di Aruba, Gobierno di Aruba a ricibi Su Mahestad Rey Willem-Alexander pa un programa oficial cu a tuma lugar na Oranjestad.
E programa oficial a cuminsa mainta cu encuentro corto entre Su Mahestad e Rey y e tres Gobernadornan di e paisnan Caribense di Reino Hulandes na Kabinet di e Gobernador di Aruba. Durante e encuentro, Su Mahestad a reuni cu e Gobernador di Aruba Su Excelencia Alfonso Boekhoudt , e Gobernador di Corsou Su Excelencia Mauritz De Kort y e Gobernador di Sint Maarten Su Excelencia Ajamu G. Baly. Despues di e encuentro, e Gobernadornan di Corsou y Sint Maarten a sigui rumbo pa Bestuurskantoor.
Posteriormente, na Fort Zoutman, Su Mahestad e Rey a sostene un encuentro protocolar cu e fraccionnan di Parlamento di Aruba y miembro di Conseho di Minister, creando un momento di dialogo institucional den marco di e celebracion nacional.
Caminata ceremonial y ceremonia oficial
Despues di e encuentro protocolar, Su Mahestad e Rey a participa den un caminata ceremonial for di Fort Zoutman pa Bestuurskantoor, caminda a tuma lugar e Ceremonia Central di Conmemoracion di 40 aña di Status Aparte y 50 aña di Himno y Bandera.
Durante e prome momento di e ceremonia, padvindernan, muchanan di scol y publico lo forma un guardia di honor banda di e ruta ceremonial for di Fort Zoutman te Bestuurskantoor. Na yegada di Su Majestad e Rey a tuma lugar un inspeccion oficial di e guardia arma, simbolisando honor y respet pa e momento historico cu Aruba ta conmemora.
Pa 8.30 di mainta a inicia e programa cu ceremonia di bandera, durante cual e banderanan di Aruba y di Hulanda lo wordo hisa, esaki encarga pa ARUMIL, acompaña pa interpretacion di e Vaandelmars. Despues a sigui interpretacion di e Himno Nacional di Hulanda y di Aruba, canta pa Maybeline Arends-Croes, acompaña pa coro y orkesta/Koperkwintet
Posteriormente a tuma lugar e discursonan oficial di Su Mahestad e Rey y di Prome Minister Mike Eman, resaltando e significado historico di e logro di Status Aparte y e importancia di identidad nacional cu e Himno y Bandera ta representa pa pueblo di Aruba.
Un logro historico di pueblo Arubiano
E celebracion di Status Aparte ta recorda un trayecto largo di lucha politico y democratico di pueblo di Aruba pa logra mayor autonomia dentro di Reino Hulandes. E proceso aki tin su raiz den incansabel esfuerso di lider- y ciudadanonan cu a lucha pa un futuro caminda Aruba por tuma su propio decisionnan.
Entre e personahenan historico cu a hunga un papel importante den e proceso ta Shon A. Eman (Cornelis Albert Eman), kende dia 18 di maart 1948 a presenta na Den Haag e mocion pa reconoce e derecho di Aruba pa separacion administrativo. E fecha aki posteriormente a bira Dia Nacional di Aruba.
Den decadanan despues, e lucha pa autonomia a sigui fortalece, entre otro pa medio di e liderazgo di Betico Croes, kende a inspira un movimento popular pa logra Status Aparte cu su lema historico “Nos mes por”.
E proceso finalmente a culmina cu e logro di Status Aparte dia 1 di januari 1986, ora Aruba a bira un pais autonomo dentro di Reino Hulandes, un momento cu a marca un logro fundamental den historia constitucional di e isla.
E celebracion actual tambe ta conmemora 50 aña di introduccion di e Himno y Bandera di Aruba (1976), simbolonan di orguyo nacional cu ta representa identidad, cultura y aspiracion di pueblo Arubiano.
Cultura y tradicion como expresion di identidad
Despues di e ceremonia oficial a sigui un programa cultural special, cu a presenta talento Arubiano y expresion di e herensia cultural di e isla. E programa a inclui cu presentacion di e Nationaal Orkest, interpretacion musical di Edjean Semeleer y Jeanedy Semeleer, poesia pa Tasho, y e ganador di e festival “Un Canto pa Aruba su Himno y Bandera 2026”.
E presentacionnan, acompaña pa coreografia di Dazzling Dancers, resaltando e diversidad cultural y musical cu forma parti di identidad di Aruba.
E ceremonia a culmina cu un defile di e guardia arma, marcha ceremonial for di Fort Zoutman pa Bestuurskantoor, acompaña pa un fly-by di dos helicopter, como simbolo di honor y reconocimento pa e momento historico cu Aruba ta celebra.
Despues di final di e ceremonia, Su Mahestad e Rey a sigui su programa oficial riba e isla.
E evento a representa un momento di reflexion y celebracion nacional, reconociendo e vision y sacrificio di generacionnan anterior cu a contribui na e logro di Status Aparte y reafirmando e orguyo y identidad di pueblo di Aruba.
