ORANJESTAD – Recientemente un medio di prensa a purba di bende pueblo un realidad distorsiona, pretendiendo cu e “elogio” di CAft pa e entrega di jaarrekeningnan atrasa ta un logro di e maneho actual di AVP/Futuro. Totalmente incorecto! Ta ora pa papia cla: e gobierno actual a haña un mesa cla di sirbi, un sistema automatisa pa 95%, i awor kier bisti paña di gala pa tuma elogio cu trabou di otro.
Ora CAft a nota cu Aruba a dal pasonan importante pa pone su administracion financiero na ordo, nan no ta elogiando un vision di e gobierno actual. Loke nan ta mira ta e resultado final di un proceso structural i doloroso cu a wordo carga pa ex-Ministro di Finansas, Xiomara Maduro.
Un structura cu no a cay for di cielo
E noticia manipulador kier laga mustra cu e “seriedad i responsabilidad” a cuminsa awor. Realidad ta cu pa añanan largo, Minister Xiomara Maduro a splica repetidamente cu e tabata trahando riba un forma structural pa elimina e atraso den jaarrekeningnan cu e mes a hereda for di añanan anterior di mal maneho.
E no tabata djis un promesa; tabata un inversion den digitalisacion i tecnologia. Ora e proceso a wordo automatisa pa 95%, e trabou di mas pisa a keda cla. E gobierno di awor simplemente a drenta den oficina, primi e “button” cu ya tabata programa, i e cifranan a sali.
Cifranan ta papia pa nan mes
E hecho cu e jaarrekeningnan di 2020 pa 2024 a wordo entrega na Algemene Rekenkamer (ARA) den 2025 no ta un milager administrativo di e coalicion nobo. Ta e culminacion di un plan di produccion cu tabata den marcha caba. Pretende cu e rapidez aki ta danki na e “maneho nobo” ta un falta di respet pa e tecniconan di Departamento di Finansa cu a traha añanan largo bou di e structura anterior pa yega asina leu.
Di gritamento den oposicion pa “sinta manera galiña riba webo”
Si tin algo cu ta causa iritacion, ta e asunto di BBO na frontera. Tempo cu e politiconan di AVP/Futuro tabata den oposicion, nan tabata grita te bati weya cu e 7% di BBO na importacion tabata e “peor medida” contra pueblo. Nan a priminti cielo y tera cu esaki mester bay.
Pero mira e realidad awe: nan tin un aña caba den gobernacion y kico nan a haci? Nada. Nan a sinta manera “galiña riba webo,” keto-keto sin mishi cu e mesun medida cu critica antes. Ya nan a pasa dos presupuesto, di 2025 y esun di 2026, y e BBO ey tey keto bay.
E formula tabata simpel: nan a critica, nan a gana voto, nan a yega… y nan a engaña. E votadonan cu a kere cu e BBO ey lo a disparce a keda premosa falso. Awor cu nan ta den e stoel cayente, e 7% ey no ta parce asina malo mas.
Elogio pa gobierno actual cu a mantene 7% import
Awor cu CAFT ta duna bon comentario riba finansas, Gobierno actual ta disfruta di e elogio, pero kico realmente nan ta disfruta? Nan ta gosa di e frutanan di Gobierno di MEP. Cu apesar cu nan a critica BBO import 7%, nan no a kite, y ta danki na esey cu awe nan resultado financiero ta cana bon.
E pregunta cardinal ta: Cu un finansas solido, cu cifranan maravilloso, dicon nos mester papia aina riba HOFA?
