Durante deliberacionnan cu e Colegionan Ehecutivo di Boneiro, Sint Eustatius y Saba, Colegio di supervision financiero di Boneiro, Sint Eustatius y Saba (Cft) a pidi atencion pa e necesidad di fortalece e capacidad di implementacion di e Entidadnan Publico. Esaki ta necesario pasobra e presupuestonan di e islanan a aumenta considerablemente desde 2010. Cft ta enfatisa e importancia di un presupuesto realistico, den cual – mas cu antes – ta tene cuenta cu e limitenan di e capacidad propio di implementacion. Principalmente den caso di Boneiro e ambicionnan no ta cuadra cu e implementacion di e presupuesto.
Capacidad di implementacion
Capacidad di implementacion ta mas cu e capacidad so. E tambe ta rekeri gobierno stabiel y procesonan cla di tumamento di decision. Ademas, ta importante pa maneho financiero ta na ordo, pa asina administracion por haci ahuste na tempo. Creacion di suficiente capacidad di implementacion no ta tarea facil, considerando e escala di e islanan. Sin embargo, priorisacion si ta yuda.
Cft a presenta su analisis tocante di e capacidad di implementacion di e Entidadnan Publico na e Colegionan Ehecutivo y e Consehonan Insular, loke a mustra e siguiente:
Capacidad di implementacion di Boneiro no ta suficiente
E capacidad di implementacion di Boneiro riba casi tur area ta insuficiente. Desde un punto di bista financiero-economico, e cantidad grandi di pagonan special di cual e termino a caduca ta preocupa Cft, pasobra esakinan ta fondonan cu por keda recupera y p’esey nan no ta beneficia pueblo di Boneiro. Banda di esaki, Cft ta mira un fuerte crecemento di e reservanan aloca y gastonan cu no a ser inclui den un presupuesto adopta. Ta importante pa Boneiro priorisa gobernacion stabiel y fortalecemento di e capacidad di implementacion den henter e organisacion. Ta un hecho cu e poblacion a crece hopi, y e presupuesto a dobla den un plaso di cinco aña. P’esey, Colegio ta compronde e complehidad di e tarea cu e sistema tin pa sigui e crecemento aki.
E mensahe central cu Cft a duna na Colegio Ehecutivo ta: “Enfoca riba loke mester haci, y haci esaki adecuadamente!”, sino, na final e ciudadanonan di Boneiro ta esnan cu ta keda perhudica.
St. Eustatius ta riba bon caminda pa ta ‘in control’
E capacidad di implementacion di Sint Eustatius ta crece visiblemente. Cft ta constata cu den e aña pasa, Sint Eustatius a tuma pasonan grandi den mehoracion di maneho financiero. Un logro importante ta e hecho cu tocante di e cuenta anual pa 2024, Sint Eustatius a haya un declaracion aprobatorio di auditor, pa prome biaha. Banda di esaki, Sint Eustatius ta trata e reservanan aloca cu cautela. Esfuerso persistente y apoyo amplio riba tur area ta keda necesario, pasobra e recuperacion ta fragil y debi na e cantidad grandi di vacatura, e operacion di e aparato civil ta keda vulnerabel. P’esey, e mensahe di Cft pa Sint Eustatius ta: “Continua riba e caminda pa ta ‘in control’”.
Saba: caminda un isla chikito por ta grandioso
E capacidad di implementacion di Saba ta na ordo pa mayor parti. Tin continuidad di calidad riba posicionnan clave, tin disciplina presupuestario solido y a duna declaracionnan aprobatorio pa e cuentanan anual varios biaha. Por lo pronto, e isla BES mas chikito ta esun cu ta logra mas. P’esey, e mensahe central di Cft pa Saba ta: “Keep up the good work!”
