E eleccion aki atrobe e discusion tocante coremento di parada a bira un topico cayente entre e dos partidonan grandi.
Eleccion pasa esey no tabata e caso pasobra pueblo y tambe e partidonan politico mester a mantene nan mes n’e medidanan implementa en conexion cu COVID-19, segun candidato number 11 riba lista di PPA, Charles Bennett.
E medidanan ey a trece cu ne:
1. Entregamento di lista sin parada.
2. Solamente dos persona por a drenta sala pa entrega lista di candidato na Conseho Electoral
3. A permiti solamente un parada so, cual tabata e Parada di Victoria. E partido cu a haya mas voto den e eleccion a haya e permiso pa core su Parada di Victoria.
Tin biaha algo fuera di normal mester pasa pa nos adopta, cambia of kibra cu cierto custumber of tradicion. Cu e medidanan di eleccion pasa nos a siña cu por hiba campaña na un otro manera, uzando creatividad y tecnología moderno. No tabatin ningun discusion entre e partidonan grandi tocante di coremento di parada. Discucion cu den pasado a caba te dilanti di “Mesa Berde”.
Den curso di e añannan a kibra cu hopi tradicion di core campaña. Por ehembel: Pegamento di Bandera den “Palo di Luz”.
E temponan ey por a haya den un “Palo di Luz” diferente bandera pega di tur partido politico. E accion di pegamento di bandera, tabata bay cu pleito, tiramento di palabra y te hasta cu bringamento. Despues di basta reunion entre e partidonan politico, Elmar y e mediadornan a logra pa para e tradicion di uza “Palo di Luz” pa pega bandera.
Tin di remarca cu hasta den e comision aki un pastoor cu a yega di comenta: “Palo di Luz no ta vota.”
Charles Bennett: “E ultimo caso di tradicion cu mi kier menciona cu a stop cu esaki ta esun di pone borchi/poster di potret y number di e candidato na cada urna electoral riba e dia di votación. Tur partido y candidato tabata purba pone su poster mas visibel posibel n’e entrada p’asina te n’e ultimo momento influencia e votado. Ta durante di ponemento/drechamento di borchi a agredi un candidato ariba lista di PPA (def. Ronny Toppenberg), pa un fanatico di un partido opositor y a fayece despues a consecuencia di a sla cu el a ricibi.
Mi a duna diferente ehempel di cambio cu a tuma luga den nos manera di core campaña cu e politiconan di antes no kier a cambia pa nada. Awendia nos no ta ni haya falta di nan. Tur e partidonan politico cu ta participa den eleccion 2024 a sinta/reuni na dos ocasion cu KPA y scucha tur e argumentonan di KPA, pakico nan ta pidi pa por fabor no tene un parada prome cu eleccion.
Casi tur partido menos MEP y AVP a comprende cu mester tene cuenta cu mas cos cu solamente e bentaha politico cu e partidonan ta kere cu nan por saca cu e coremento di parada.
