Diahuebs mainta e homber J.F. (34), a presenta den Corte di Husticia pa e caso penal cu Ministerio Publico a cuminsa contra dje.
SOLO DI PUEBLO por a compronde cu Hues no ta haya cu J.F. tin culpa di a dal e turista mata pero si ta culpabel di a core bay. Hues a bisa cu e pareha turista a cruza caminda ora cu tabatin hopi auto riba e caminda prinicipal na Savaneta banda di Citco.
DAL TURISTA MATA Y CORE BAY
Hues a bisa cu dia 1 December 2023 den careda di 7’or di anochi a sosode un accidente tragico na altura di Citco Savaneta, caminda un pareha turista a wordo gedal cu auto y cu e chofer di e auto a core bay.
Polis a constata cu e homber turista B. a sufri fractura habri y door di a sangra hopi, a bay den shock y a fayece. Su pareha dama no tabata hopi serio herida. A resulta cu ta J.F. tabata e chofer di un Nissan X-Trail cu a dal e pareha turista. E auto a wordo confisca caminda a constata cu e glasnan di e auto ta getint preto.
J.F. a bisa Hues cu e no a mira e pareha ariba caminda. Durante e interogacion di Hues, J.F. a admiti cu e no tin rijbewijs. El a bisa cu e auto no ta di dje sino di un persona cu e tabata drecha e auto p’e. Hues a mustra cu e auto ta di J.F. pasobra e numbernan ta riba nomber di J.F. J.F. a bisa Hues cu el a pone su numbernan di auto riba e auto pa asina e por core e auto y busca piezanan pa e auto y check di biaha si nan ta fit.
Segun J.F., e anochi ey e tabata core 70 pa 80 km. Hues a bisa cu riba e caminda ta permiti core 60 km. El a bisa Hues, ora el a mira cu e tabata core 80 km, el a baha velocidad. El a pasa un auto y despues di un rato el a dal e pareha cu tabata cruzando caminda. Segun J.F., el a mira un sombra pero no por a haci nada mas. Hues a bisa cu tin un testigo M. kende a bisa cu na altura di Do It Center den e birada, e X-Trail a pas’e cu velocidad halto y despues a drenta fila bek y un rato despues a dal e peaton. Segun J.F. e tabata den auto cu su yiu chikito cu tabata yora y su pareha. El a bisa cu el a pasa e auto hopi mas promer cu e accidente.
J.F. a bisa Hues cu e no a mira e pareha riba caminda. El a bisa Hues cu si mira e sla na e auto, e tabata na banda. El a kere cu ta contra un cacho of algo otro el a dal. Hues a puntr’e pakico e no a para. Segun J.F., e no a para pasobra su yiu chikito tabata yora. Hues a bisa cu awor cu tur cos a sosode, kico J.F. ta pensa. Segun J.F., el a spanta y a core bay.
CHOFER A YORA DEN CORTE
Hues a remarca cu J.F. ta blo papia di su yiu y no ta pensa riba e persona cu el a dal mata. Segun J.F. e no tabata sa cu ta un hende. Ta ora el a yega cas el a scucha esey den noticia. Hues a bolbe puntra J.F. kico J.F. ta pensa awor di e accidente. J.F., na yoramento a bisa Hues cu ta duel’e hopi loke a pasa. El a bisa Hues cu no tin zebrapad caminda e accidente a sosode y e caminda eynan tabata sin luz. Hues a remarca cu si ta asina, lo no tabata mihor pa J.F. a core menos cu 80 km? Hues a sigui bisa cu J.F. no a mira pero a brake. Tabatin marcanan di brake riba caminda. Hues a mustra cu e pareha di J.F. a bisa cu e tabata riba su cellular pero el a mira manera un cabez dilanti di e auto y a grita J.F. pa brake.
Hues a bisa cu e auto no tabata asegura. Segun J.F. e auto tabata asegura. Hues a bisa cu segun relato di Polis y aseguro, e auto no ta aseguro. Ta asina cu e auto a wordo confisca.
FISCAL
Fiscal ta haya cu J.F. tabata core cu velocidad 80 km cu ta mas cu e 60 km cu ta permiti. Un rato promer el a pasa un auto. E glasnan di auto y e windshield tabata getint hopi scur. Ademas J.F. no tin rijbewijs. J.F. ta bisa cu e no a mira e hendenan. E amiga di J.F. sinta na banda a bisa cu el a mira sombra di un hende. Na opinion di Fiscal, tin hopi auto ta pasa riba e caminda principal ey y hopi hende tambe ta cruza caminda. Fiscal ta haya cu J.F. a core hopi no responsabel. Fiscal a hasta mustra e grado di tint di e auto riba un papel cu ta practicamente preto.
NO CULPA DI CAUSA MORTO DI TURISTA
Fiscal a bisa cu e señora B. a bisa cu tabatin hopi auto riba caminda y el a lanta man pa auto para pero ningun auto a para. Segun investigacion Forence e accidente a sosode riba caminda. Fiscal ta conclui cu e pareha tabata riba caminda. Fiscal ta haya cu como chofer di auto bo mester tene cuenta cu hendenan cu ta cruza caminda. Na opinion di Fiscal, tur cos ta mustra cu e pareha turista a bay cruza caminda. Fiscal a bisa cu e no ta haya haya proba cu ta door di culpa di J.F. a dal e pareha turista. Fiscal a pidi Hues pa declara J.F. liber di esaki. Fiscal a sigui bisa cu subsidiario e ta haya J.F. culpabel esta, di a core bay despues di e accidente. Tambe cu J.F. tabata core sin rijbewijs.
Fiscal a bisa cu e yiu di e pareha B. a haci demanda di daño pa cubri gastonan di entiero cu ta algo mas cu 4 mil dollar. Tambe e yiu a haci demanda di daño inmaterial di 50 mil dollar pa e pareha cu tambe a wordo gedal.
Fiscal a bisa cu por mira claramente cu ta duel J.F. hopi loke a sosode. Sinembargo Fiscal a mustra cu diferente biaha J.F. tabatin casonan di core sin rijbewijs. Fiscal a tuma J.F. na malo pa esaki. Fiscal a exigi 80 ora di trabao y 120 ora di trabao pa a core bay. 2 aña sin rijbewijs y 2 aña castigo condicional. Fiscal a bisa cu e auto mester keda confisca.
ABOGADO
Abogado mr. Edwards a bisa Hues cu e accidente a sosode anochi riba un caminda cu no tin suficiente luz. J.F. tabata core cu su famia den auto y sin rijbewijs. Di spanto el a core bay despues di e accidente. Esaki no ta corecto pero ta di compronde. Abogado a bisa cu e ta comparti punto di bista di Fiscal cu mester declara J.F. liber di a ocasiona e accidente. E abogado a pidi Hues pa tene cuenta cu J.F. kier traha y mantene su famia y su yiu. Na opinion di abogado, e hecho cu Fiscal ta exigi pa e auto keda confisca, ta hinca J.F. den mas debe pasobra e auto no ta di dje. Pa loke ta e demanda di daño, e abogado a bisa cu e gastonan di entiero ta real pero no ta haya cu a hustifica e daño inmaterial. El a pidi Hues declara esaki no admisibel. El a bisa cu ta duel J.F. masha hopi cu loke a sosode.
SENTENCIA
Hues a sera tratamento di e caso y a dicta sentencia di biaha. Hues ta haya cu ta un accidente tragico y no ta haya cu J.F. tabatin intension den esaki. Hues ta haya J.F. su comportacion di core auto ta peligroso. Hues ta comparti punto di bista di Fiscal riba e punto aki. E forma con a core bay despues di a dal un pareha turista. E glasnan di auto tabata hopi scur getint y tabata core duro. Hues ta haya cu e pareha turista a tuma un decision malo pa cruza e caminda ora tin hopi auto pasando. Na opinion di Hues, no por bisa cu J.F. ta culpabel di a causa morto di e homber B. El a declara J.F. liber pa morto door di culpa pero si ta haya J.F. culpabel di a core peligroso, core bay despues di e accidente y core sin rijbewijs y sin aseguro. Hues a tuma J.F. na malo cu e ta sigui core sin rijbewijs. Pa e coremento sin rijbewijs, Hues a condena J.F. na 10 siman di prison di cual 8 siman ta condicional cu un tempo di prueba di 2 aña. Hues a bisa cu ta basta cu coremento sin rijbewijs! El a condena J.F. na 2 aña sin por core auto y e auto ta keda confisca. Hues a confirma e exigencia di Fiscal esta 80 ora di trabao of 40 dia sera pa a dal hende cu auto. Tambe Hues a condena J.F. cu e mester paga e daño material di algo mas di 4 mil dollar. Hues a pone medida di pago. Pa loke ta e demanda di daño inmaterial, Hues a declara esaki no admisibel.
