Hues di Corte di Husticia a dicta sentencia den e caso penal cu Ministerio Publico a cuminsa contra e homber Venezolano Jacinto Rosendo Tubinez. E acusado riba 27 October 2024 anochi cu su auto, a dal e dama J. Patiño Castro na Shiribana mata y core bay.
SOLO DI PUEBLO por a compronde cu Tubinez tabata sera den KIA y despues di 106 dia a wordo laga liber y Guarda Nos Costa a sak’e for di Aruba. Hues no ta haya Tubinez culpabel di a causa morto di e dama J. Patiño Castro, pero si cu e ta culpabel di a mata e dama cu auto y core bay. Hues a condena Tubinez na 106 dia di prison cu ta igual na loke Tubinez tabata sera promer cu el a wordo saca for di Aruba.
DAL DAMA CU AUTO Y CORE BAY
Tratamento di e caso a tuma lugar sin cu e sospechoso Tubinez tabata presente y recien Hues a dicta sentencia.
E acusacionnan cu Fiscal a presenta contra Tubinez ta: cu riba 27 October 2024, den oranan di anochi, el a causa morto di e dama J.Patiño Castro, cu tabata core riba un step electronico na altura di un beauty salon na Shiribana. E impacto tabata asina fuerte cu e victima a fayece na e lugar di accidente. Ta asina cu Turbinez a core bay laga e victima benta abao. E dama a laga dos yiu atras.
NO A CAUSA MORTO
Hues den su sentencia ta mustra cu e ta comparti punto di bista di Fiscal, cu Tubinez mester wordo declara liber di e acusacion di a causa morto di e victima. Hues ta mustra cu for di investigacionnan haci, no tin indicacion cu e sospechoso tabata core irresponsabel. Na opinion di Hues, for di imagennan di video di seguridad y tambe calculacionnan cu expertonan di trafico a haci, por conclui cu Tubinez tabata core mas abao cu e velocidad permiti cu ta 80 km.
STEP SIN LUZ
Hues a bisa cu e ta tene cuenta cu e step electronico no tabatin luz patras y cu ta e victima tabatin un luz blanco pega patras di su tas di lomba. Na opinion di Hues, no por bisa for di ki distancia lo por mira e luz aki.
Ademas ta bin aserca cu e victima a cuminsa sortea na man robez y tabata na e strepi mey mey di caminda, ora cu e auto a dal contra dje. Hues a mustra, cu e forma di a core e step, por a causa cu e ta menos visible y door di esey e sospechoso no por a brake na tempo.
CASTIGO
Pa cu e castigo, Hues ta haya cu e sospechoso Tubinez a pone trafico den peliger y a kita bida di un dama. Banda di esey, Tubinez a core bay for di e accidente. Hues ta haya cu door di e accion aki, Tubinez a pone e famia di e victima den mas sufrimento innecesario. Hues ta tuma Tubinez na malo pa esaki.
Hues a sigui bisa cu Corte ta realisa cu ningun castigo lo por haci husticia pa e perdida di e victima y sufrimento di e famia.
Pa loke ta e demanda di daño per huicio, Hues ta haya cu esaki ta mucho complica pa keda trata den un caso penal. El a bisa e mayornan di e victima, presente den sala di Corte cu lo ta mihor cuminsa un caso civil.
Hues a condena Tubinez na 106 dia di prison, cual ta e tempo cu e tabata cera den KIA y despues a wordo saca for di Aruba.
