Un grupo di 20 hoben a participa den e Carlos Bislip Drum Set & Percussion Camp 2022. E programa tabatin un duracion di cuater siman, asistiendo di dialuna pa diabierna pa un total di 20 dia entre 11 di juli y 5 di augustus na Scol di Musica Rufo Wever. Como clausura a presenta un recital den Cas di Cultura dia 6 di augustus ultimo cu a cay masha na agrado di e publico consistiendo di mayor y conocinan impresiona di loke e muchanan a siña.
Pa Carlos Bislip ta un satisfaccion enorme di mira e resultadonan aki, mescos cu ora e participantenan ta sigui desaroya y resalta den e mundo musical of tuma e decision pa studia musica den exterior, como por ehempel: Lidrick Solognier, Stephen Diaz y Denzil Tromp. Adicionalmente, e participantenan ta forma un nucleo di percusionista cu ta busca pa asisti agrupacion y festival local.
Na aña 2009 a organisa e prome camp cu e obhetivonan di familiarisa un y tur mas e mundo di percusion cu ta inclui Drum Set, Conga y Timbal y pa demostra cu a traves di instruccion intensivo ta siña masha hopi mes. Den practica a ripara cu tambe a aporta na e desaroyo di e hobennan cu habilidadnan di soluciona problema, colabora cu otro y hasta duna instruccion. Esey ta motibo pa cual, den e camp di 2022 a conta entre e asistentenan cu cinco ex participante.
E Drum Set & Percussion Camp 2022 tabata posibel danki na e contribucion esencial di Prins Bernhard Cultuurfonds Caribisch Gebied, UNOCA, CEDE Aruba, Departamento di Cultura Aruba, Scol di Musica Rufo Wever, VNO, Setar, 520 Home Sweet Home, Citgo Savaneta, A Esmeralda Aruba y Vibration PR. Tin un palabra sincero di danki tambe pa tur cu a colabora di un manera of otro y na e mayornan pa e confiansa duna na e camp. Ta spera cu proximo aña lo por bolbe brinda e oportunidad aki. Pa mas informacion y potret di e camp, bishita e pagina di Facebook di Carlos Bislip Drum Set And Percussion Camp.
