Cleveland Indians ta gana Los Angeles Angels di Anaheim den wega di MLB Little League Classic 2021

0
42

DEPORTES – Diadomingo anochi e wega di siman tabata na un stadion diferente, e biaha aki a tuma lugar na Williamsport caminda tur aña e serie mundial di Little League ta tuma lugar y pa algun tempo caba durante serie mundial di little league, MLB Baseball ta hiba un wega na e compleho deportivo aki cual wega ta carga titulo di MLB Little League Classic.

E aña aki e dos ekiponan cu a enfrenta otro den e wega aki tabata Los Angeles Angels di Anaheim y Cleveland Indians.

For di trempan por a tuma nota cu tabata tin hopi hungador di Little League di varios parti di mundo a haci acto di presencia na e wega aki y un di e hungadornan cu mas a ricibi apoyo ta e fenomeno actual di baseball cu ta Shohei Othani kende ta pitcher habridor normalmente, pero tambe tin un poder di bateo pa ekipo di Los Angeles Angels.

Ekipo di Cleveland Indians a presenta cu Cal Quantrill como nan pitcher habridor mientras cu Los Angeles Angels tabata tin Jose Suarez como nan pitcher habridor.

Un wega di poco careda, den bom di prome inning ekipo di Cleveland Indians ta logra anota 2 careda pa medio di un homerun conecta pa Amed Rosario.

Den bom di cinco inning, ekipo di Cleveland Indians ta score 1 careda mas pa haci e wega 3-0 y esey tabata tur e caredanan cu a wordo anota den e wega aki.

Cleveland Indians a score 3 careda, a bati 6 hit y no a comete error, pitcher ganador di e wega aki a resulta e habridor Cal Quantrill, mihor bateador pa ekipo di Cleveland Indians a resulta Amed Rosario cu a bay di 4-3 incluyendo 1 homerun.

Los Angeles Angels no a logra anota careda, a bati 4 hit y no a comete error, pitcher perdedor a resulta Jose Suarez, mihor bateador pa Los Angeles Angels a resulta Shohei Othani cu tabata tin 1 hit den 2 turno na bate.

Falta mas di 30 wega ainda pa campeonato regular termina, tin algun ekipo cu chance di logra playoff y tin algun ya caba cu sa cu nan no ta yega playoff e aña aki, ban mira e ultimo weganan aki con nan ta desaroya, kende lo clasifica y kende lo dobla warda te otro aña.

LEAVE A REPLY

Please enter your comment!
Please enter your name here