Diasabra awo, 15 di november, pa 7:00 p.m., ZEER TROPISCH Art House na San Nicolas ta habri su portanan pa e exhibicion colectivo “COLECTIVA 2”. E proyecto aki, bou curaduria di Nelson Gonzalez, ta un produccion di Art Rap Foundation y ta presenta obra di ocho artista local di diferente generacion: Glenda Heyliger, Sharina Gumbs, Elly Refunjol, Kenna Foxford, Lenny Lea, Dimanche-Jolie, Tuesday Irwin y Hugo Parra.
E exhibicion ta e resultado di un “Club di Dibuho” cu a explora e relacion profundo entre arte y e cultura di barnan di San Nicolas. Un enfoke special a bay na e “animeremeisjes”, cu ta un parti integral di e bida nocturno di e bario. Nan a wordo invita pa participa no solamente como modelo, pero tambe como interlocutor, creando un acto di dialogo, observacion y reconocimento mutuo.
E proyecto aki no ta para su so. E ta un continuacion di un serie di accion di Art Rap Foundation pa activa e comunidad di San Nicolas for di su mesun practicanan local, manera a haci anteriormente cu barbero y artista di tattoo. E metodo di curaduria ta traha cu loke ta biba den e memoria y sintimento di e comunidad, en bes di enfoca riba opinion individual.
COLECTIVA 2 ta un intento pa compronde e spirito di San Nicolas y ta cuestiona con e bario por bira un comunidad di encuentro, resiliencia y expresion. E ta un documentacion di presencia y interaccion humano.
E apertura ta tuma luga na ZEER TROPISCH Art House, situa dilanti di Charlie’s Bar na San Nicolas, diasabra 15 di november pa 7:00 p.m.
