Colegio Arubano ta den preparacion pa celebra nan siman di aniversario den october. Henter e siman di 14 di october lo ta den esfera festivo na Colegio Arubano. Cuminsando e dialuna cu un bunita celebracion Ecumenico pa henter scol. Sigui pa diabierna, cu lo ta un dia creativo. E dia aki lo tin e ‘crazy hair day’ cu e tema di 65 Aña Colegio Arubano. E colornan blauw y oro mester resalta. Por ultimo, diasabra 19 di october Colegio ta organisando un tremendo actividad pa pueblo di Aruba, caminda lo tin benta di diferente pasaboca y e bar lo ta bon surti. Carchi ta obtenibel na administracion di scol, Plaza Bookshop y Pay.aw. Corda sigura bo carchi trempan pa bo no keda afo!
Colegio Arubano ta un scol cu ta traha hopi duro pa keda mantene un calidad halto di enseñansa. Tur departamento di esnan di mas hoben di Ciclo Basico, pa esnan di Ciclo Avansa y examenklas ta percura pa nan grupo ta bon atendi y cu nan ta ricibi e guia y formacion necesario pa bira un profesional mañan. Den transcurso di añanan Colegio Arubano a sa di mantene su exito y percura pa keda stabil. Colegio Arubano ta wak bek ariba un pasado hopi bunita, rico na creatividad y alegria di hubentud, cu un lugar den curason di hopi y cu alabes a percura pa keda cu bista riba futuro na beneficio di nos hobennan.
