Ta urgi Minister di Enseñansa pa intermedia y pone ordo!
Semper tin problema..
Cada ves di nobo nos ta mira mes un cos ta sosode na Colegio Arubano. Tur loke a pasa awor, a pasa caba. Dirigentenan den bestuur di e scol ta parce di ta ‘roekeloos’, y ta tuma decision tras di decision sin importa consequencia.
Parce cu hendenan grandi ya no por compronde otro mas. Esaki a sosode caba prome cu covid, y awor ta parce peor.
Nor por constata pues cu cada ken ta riba nan mundo di poder y powerplay y sin importa e daño cu nan ta ocaciona na nos muchanan.
Hasta cuando? Ta urgi Minister di Enseñansa pa e pone ordo riba e situacion aki. Maske su autoridad ta limita, pasobra Colegio Arubano no ta cay bao di Gobierno, sino bao di un stichting di obispo, y e minister no por dicta den dicho stichting.
Pero, loke si ta un hecho ta cu Gobierno ta manda placa pa e stichting aki y e ora mester cuminza na exigi un maneho drechi y responsabel. No por ta asina cu cada rato di pleito unda e muchanan ta keda perhudica.
Obispo na Willemstad tambe mester cuminza pone su mes mas na altura!
