Pabien Aruba
Colegio Laura Wernet-Paskel ta participa di a tuma nota di e grato noticia for di Den Haag, Hulanda di e asignacion di un caya na nomber di sra. Laura Wernet-Paskel (dfm)
E noticia aki siguramente ta yena nos tur di Aruba cu un gran satisfaccion, pa mira cu un yiu di tera ta haya un reconocimiento asina grandi, despues di 59 aña di su fayesimento. Nos como e famia grandi di Colegio Laura Wernet-Paskel, esta tanto e maestonan como e alumnonan, no por sconde nos alegria y gratitud pa e gesto aki.
Manera ta conoci e scol aki na Kadushi Largo ta existi desde aña 1962 bou nomber di Sint Janschool y na na aña 1991 a cambio e nomber di e scol na sra. Laura Wernet-Paskel (dfm). Actualmente e scol tin 16 maestro y 240 alumno.
Sra. Laura Wernet-Paskel tabata un persona excepcional. No ta por nada e ta e figura femenino di siglo 20. E tabata un di e prome maestronan di scol cu a studia y gradua na Hulanda den 5 idioma, esta hulandes, ingles, spanjo, frances y aleman. Por corda cu sra. Laura tabata tin un biblioteca chikito na su cas na Santa Cruz unda e tabata fia buki for di Hulanda na entre otro soeur y pastornan. E tabata un gran educadora. Sra. Laura Wernet-Paskel tabata tambe e prome dama cu a subi un lista politico aki na Aruba.
Loke a resalta den tur su pasonan aki ta cu e la demostra como un ser femenino cu e tabata determina pa lucha na un manera subtil pa e sexo femenino wordo balora. Tambe su fe den nos Señor tabata grandi y su participación activo na e religion Catolico tabata remarkabel. E tabatin amistad estrecho cu pastoor y soeurnan di madre patria Hulanda y te na ultimo a keda tene correspondencia cu nan.
Mi ta kere cu e directiva y dictorado di SKOA tambe mester ta orguyoso di tin un scol nombra na e gran dama aki. Cu Hulanda awor a dedica un caya na su nomber ta muestra di gran balor cu nan tin pa e persona noble aki. Ban spera cu aki na Aruba tambe por sigi e ehempel aki pasobra Laura merece.
Nos scol tambe ta bay haci su 60 aña di existencia na maart venidero. Nos lo bay tin un dobel celebracion. E dia cu lo inaugura e caya na su nomber na Den Haag, Hulanda, sigur nos lo conmemora e dia aki cu un bunita actividad aki na Aruba.
Por ultimo Colegio Laura Wernet-Paskel kier hasi uso di e oportunidad aki tambe pa extende un palabra di gratitud na sr. Elias Aarab pa tur su esfuerzonan hasi pa cu e asignacion na un caya na Den Haag Hulanda na nomber di sra. Laura Wernet-Paskel, patrona di nos scol na Kadushi Largo. Nos ta sumamente contento y orguyoso cu e trabow cu sr. Elias Aarab a hasi den nomber di Pueblo di Aruba
Nos ta pidi pa pueblo di Aruba keda pendiente di e celebracion di e momento historico aki y nos ta spera cu pueblo di Aruba lo responde na e actividadnan cu lo wordo organisa pa asina duna honor mereci na e gran yiu di tera, sra. Laura Wernet-Paskel (dfm).
Cabesante di Colegio Laura Wernet-Paskel
Bernadetta Figaroa-Geerman
