Banco Central di Aruba (BCA) a conclui e encuesta di percepcion di negoshi pa e di tercer trimester di 2024. E encuesta di percepcion di negoshi ta evalua e percepcion economico di e negoshinan local.
E asina yama ‘Business Perception Index’, cu ta consisti di e indicenan di condicion economico actual y condicion economico a corto plaso, a baha for di 107,4 den e di segundo trimester di 2024 te na 106,3 den e di tercer trimester di 2024 (mira Grafico 1).
Grafico 1: ‘Business Perception Index’.
Fuente: Banco Central di Aruba
E Indice di Condicion Economico a corto plaso y Indice di Condicion Economico actual a baha cu 1,9 punto di indice y 0,7 punto di indice te na 105,7 y 106,6, respectivamente, den e di tercer trimester di 2024 (mira Grafico 2).
Grafico 2: Resultado di Condicion Economico actual y Condicion Economico a corto plaso durante e di tercer trimester di 2024.
Fuente: Banco Central di Aruba
E expectativa pa locual ta crecemento economico, 44,2% di negoshi encuesta ta anticipa un crecemento economico positivo den e siguiente 12 lunanan (mira Grafico 3).
Grafico 3: Expectativa di crecemento economico den e siguiente 12 luna.
Fuente: Banco Central di Aruba
Durante e di tercer trimester di 2024, e porcentahe di negoshi encuesta indicando “bahada” den empleo a cay cu 8,2 punto di porcentahe te na 5,7%. E porcentahe di negoshi encuesta cu a raporta un “ganashi” a subi cu 3,2 punto di porcentahe te na 86,5%, mientras cu e porcentahe di negoshi encuesta indicando “mehoracion” den e condicion economico actual di inversion a subi cu 12,6 punto di porcentahe te na 40,4% den e di tercer trimester di 2024. Encuanto condicion economico a largo plaso pa e siguiente 12 lunanan, 55,8% ta anticipa cu e tasa di inflacion lo varia entre 2% y 3%.
E relato completo di e encuesta di percepcion di negoshi ta disponibel ariba website di BCA www.cbaruba.org
Banco Central di Aruba
11 november 2024
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.
Pa mas informacion tocante Banco Central di Aruba, por bishita su website www.cbaruba.org
