Diaranson 7 di juli a tuma luga e di dos sesion di e Comision Recuperacion Economico institui door di Minister Geoffrey Wever. E comision ta trahando hunto pa formula incentivanan fiscal y economico cual lo mester stimula inversion y economia di Aruba.
Clima empresarial, facilidad legislativo, recompensa fiscal pa cierto inversionnan y condicionnan necesario ta keda central na e discusion. Di parti di gobierno di Aruba esaki por sirbi como un herment pa stimula e tipo di inversionnan necesario cu lo por beneficia comunidad y crea balor agrega pa pais.
Un hopi bon sesion, caminda a cuminsa structura e metanan cu kier logra, y e incentivanan necesario pa logra e metanan aki. “Nos ta contento cu e direccion cu e reunion ta tumando, awe tabatin hopi bon idea presenta y aki bo ta wak cu Aruba su sector comercial ta creativo, tin hopi conocemento y kier contribui”, Minister Wever a menciona.
Lo sigui colabora entre e comision dentro e dianan binidero. Por spera cu un raport final lo ser presenta dentro di algun siman na Gobierno di Aruba. Minister Wever ta hopi positivo riba e bon recomendacionnan poni riba mesa, y cu implementacion di esaki lo aporta na Aruba su resiliencia y determinacion pa desaroya un economia moderno y duradero.
