Djis wanta un rato cu e custumber di cuminsa bebe, for di merdia sea ora sali di trabao, of tin biaha durante trabao y yega cas cansa sigi bebe, y ora 12or anochi bati cu tin cambio di anja, bo ta asina burachi cu bo no sa na unda bo ta of bo ta drumi un banda manera hende cu no tin famia.
A yega tempo di kibra cu e tradicion ey cu no ta yuda cu nada ,y ban atende cu Dios, den kende nos tin fe ,speransa, goso y mas cu tur cos Salbacion y bida Eterna.
Na prome lugar pa un Famia uni den oracion, nan mester ta bon un cu otro, y pa nan haci esey, pordon ta hopi importante den un hogar, pasobra hende cu no ta pordona no por haci oracion pa otro.
Pasobra hende cu rabia y odio contra otro no por haci oracion pa otro , pasobra e consenshi no ta limpi, y e comunicacion cu Dios no tey, No laga nos gaña nos , hende no por haci bofon di Dios.
Pesey poniendo tur mentira un banda,cada un di boso papia berdad cu su prohimo,pasobra nos ta miembro di otro. Rabia ma no haci pica,no laga solo baha riba boso rabia.( Efesionan 4:25-26-27).
Cada biaha cu tin pleitamento den cas y no tin pidimento di despensa, ni tampoco respet bin bek na su lugar, e diabel ta cohe bentaha y asina trece violencia domestico, cu tur su consecuencia tristo cu por tin,
Cuanto biaha bo no ta tende bisiña ta bisa, na e cas ey ta tur ora tin pleitamento, y caminda tin pleitamento y desorden e Spirito Santo di Dios no tey, y esey tur hende mester sa. Pasobra palabra malo, griteria, calumnia,ta haci Spirito Santo di Dios tristo.
Y no laga nos lubida locual tin para scirbi den Hebreonan 12:14: Aspira pa tin pas cu tur hende, y santificacion, sin cual ningun hende lo mira Señor.
Ta dificil biba den pleito, rabia y discucion constantemente. pasobra e educacion di muchanan ta cay na suela, ora nan mira comportacion malo y degenera di nan mayornan, pasobra tur bon ehempel ta bini for di cas, y mester wordo sembra for di chikito den nos muchanan.
Ki bal la pena nos tin cas asina grandi, cu tur tipo di luho, y nos no por biba na pas cu otro.
Si den cas un persona sa cu e ta causante di discucion, e persona mester arepenti, cambia su actitud pa asina pas por reina den famia.
Dios ta stima famia, Dios ta sostene famia, Dios ta cuida famia, pasobra famia a wordo institui door di Dios, como e pilar di mutiplicacion, no ta existi multiplicacion humano, si no tin relacion sexual entre homber y muher,y asina un famia ta bini na existencia.
E amor di Dios den cas di famia, ta nifica cu e lus di Dios ta den e cas ey. Y caminda tin lus di Dios tin tur cos bon. Pasobra e lus di Dios ta corre cu scuridad, y ta esey tur hogar mester.
Pesey pordon den cas di famia ta masha importante, hopi biaha prome cu hende corre bay abogado pa divorcia, corre bini serca Dios, kende ta pordona, y ta siña nos pordona, pasobra si nos no pordona Dios tampoco ta pordona nos.
Ki dushi ta ora henter famia por uni hunto , pone tur diferencia di opinion un banda, pordona otro y drenta den oracion, cu alabansa den cas, y habri un anja bon, feliz y bendiciona.
Sinceramente, Pastor Marcel Balootje
