Tin hopi decision cu ta dificil y no ta popular
ORANJESTAD – Den bida cada uno di nos tin cu asumi nos responsabilidad. Na momento cu pandemia a presenta na maart 2020 como Minister encarga cu Finansa y Asuntonan Economico, Xiomara Maduro mester a tuma decision pa salba economia y e bienestar general di e hende na Aruba. Sigur den e situacion cu nos pais y mundo henter a haye confronta cune, no tabata decisionnan facil y tampoco popular. Na e momento ey mester a scoge pa Aruba y Minister Maduro ta consciente di e critica y hasta e menasa cu ta wordo lansa, pero si no a tuma decision, awe e panorama lo tabata uno completamente diferente y e retorica lo tabata uno di cuestiona pakico no a tuma decision pa evita caos na Aruba.
E esfuersonan di Gobierno di Aruba a wordo reconoci pa IMF den nan rapport na maart ultimo. Gobierno di Aruba a actua lihe y cu esaki a yuda scapa bida di hende y comercio den e pandemia. Gobierno di Aruba a percura cu mas di 450 miyon florin den diferente sosten financiero pa asina por a mitiga e efecto riba nos economia. E maneho hiba pa Gobierno di Aruba door di a tuma e decisionnan necesario na tempo a percura pa e sistema di cuido, economico y fiscal di nos Pais a keda intacto.
E mandatario ta declara cu e no tin problema cu critica pasobra esaki ta un derecho di tur, pero asumi responsabilidad y actua na bienestar di tur, ta keda e deber di algun. Aruba ta di nos tur y ta nos tur mester asumi nos responsabilidad.
