Siman pasa diabierna dia 17 di september Sr. Molina hunto cu otro coleganan a huramenta como parlamentario di pais Aruba y asina tambe oficialmente a bira un representante di pueblo. Cu 23 aña di experencia den cuerpo policial y como un representante digno di San Nicolaas e ta enfatisa cu su enfoke lo ta seguridad y desaroyo di nos Sunrise City.
Pa Sr. Molina e ta importante pa uza su conocemento y exprencia pa percura cu nos pais ta keda uno sigur. Seguridad den un pais ta importante pa e desaroyo di nos muchanan, pa nos mes y tambe pa nos bishitantenan cual na su turno ta proteha nos economia. “Como parlamentario lo mi aporta na esey door di participa den comision fiho di husticia y asina mantene un bon fluho di informacion cu Minister di Husticia y e departamentonan concerni”, Sr. Molina ta bisa. Na momento cu e comisionnan aki keda oficialmente estableci parlamentario Molina lo comparti cual tur e ta forma parti di dje y cual di nan e ta precidi.
Siguiendo cu e di dos punto di enfoke di Sr. Molina e ta bisa: “Ami, como un representante di San Nicolas mi lo scoge sigur pa participa den comisionnan unda ami por aporta na e desaroyo, na rebiba e districto aki”. Sr. Molina a elabora cu no ta solamente e intencion pa rebiba comercio na San Nicolaas pero tambe por ehempel, haci e districto uno atractivo pa bishita y pa organisa eventonan cultural y deportivo henter aña.
Finalisando Sr. Molina a gradici partido MEP pa e oportunidad, su A-Team pa e tempo, energia y confiansa y tambe pueblo di Aruba pa comparti nan preocupacionnan, ideanan y sugerencianan di con nos por sigui desaroya nos pais. Ademas e ta gradici su votadornan pa permiti’e ta parti di e organo mas halto di nos pais. Bon dia miembronan di prensa, masha danki pa boso presencia. Bon dia Aruba, felis diaranson.
