E homber J.M.Z. (25) awe mainta a presenta den Corte pa scucha su sentencia. E ta wordo acusa di ta complice pero e ta bisa cu e no tin nada di haci den e caso di D’Aguiar cu a fayece na Aruba door cu bolitanan di cocaina a kibra den su stoma.
SOLO DI PUEBLO por a compronde cu Hues a bisa J.M.Z. cu e no a para responsabel pa su acto. Hues ta hay’e culpabel y a subi e castigo cu Fiscal a exigi.
BOLITANAN A KIBRA Y HOMBER TA MURI
Dia 27 Juni 2025, tratamento di e caso a tuma lugar caminda e hombernan J.M.Z. (25) y G.E.T. (40) a presenta den Corte. Nan ta wordo sospecha cu dia 26 di December 2024 a laga e defunto Terence D’Aguiar guli cantidad di bolitanan di cocaina na Colombia y ora D’Aguiar a yega Aruba, 2 bolita a kibra cu a causa cu D’Aguiar a fayece. Investigacion a mustra cu D’Aguiar a guli 42 bolita cu a pisa 504 gram. A constata cu e bolitanan tabata mal traha y cu 2 a kibra.
Promer cu tratamento di e caso, Hues a bisa cu abogado di G.E.T., mr. D.Croes, a notifica cu e no por ta presente pa defende su cliente G.E.T. y a pidi pa pospone e caso. E caso di G.E.T. a keda pospone pa October 2025.
Fiscal acusa J.M.Z. cu entre 24 – 26 December 2024 hunto cu otro of so, a importa cocaina na Aruba y of Colombia.
Hues a bisa cu segun Polis, 26 December 2024, Polis a haya informacion cu un hende cu a guli bolitanan a bin for di Colombia y a fayece. Ta asina cu victima ta D’Aguiar.
Fiscal a mustra cu 27 December 2025 e pareha di J.M.Z. a declara na Polis cu J.M.Z. a bis’e cu e mester bay Colombia pa controla cu D’Aguiar ta guli bolitanan. E pareha di D’Aguiar a bisa cu G.E.T. a bisa cu J.M.Z a bay cu D’Aguiar pa percura cu D’Aguiar ta guli bolitanan y bin Aruba. Fiscal ta haya cu tin suficiente prueba cu J.M.Z. a yuda den traficacion di 504 gram di cocaina.
Fiscal a señala cu na 2022, J.M.Z. a wordo condena pa droga y awor atrobe. Fiscal ta haya cu J.M.Z. tabata intermediador pa percura cu D’Aguiar ta guli e bolitanan. Fiscal a exigi 18 luna di prison.
ACUSADO CONDENA NA 2 AÑA DI PRISON
Hues a bisa cu el a evalua declaracion di e testigonan y J.M.Z. mes. Hues a rechaza defensa di abogado mr. Odor. Hues ta haya cu a base di e declaracionnan di e testigonan, por conclui cu J.M.Z. riba orden di G.E.T., a bay Colombia pa percura cu D’Aguiar ta guli bolitanan y bin Aruba.
Pa cu e castigo, Hues a bisa cu e ta tene cuenta cu J.M.Z. ta complice di importacion di cocaina y a percura cu D’Aguiar a guli bolitanan. Hues a sigui bisa cu el a ripara cu durante tratamento di e caso, J.M.Z. no a para responsabel pa loke el a haci.
Hues a bisa cu e ta tene cuenta tambe cu recien, J.M.Z. tabata condena pa droga y esey no a pone cu J.M.Z. a stop sino a sigui. Hues ta haya e 18 luna di prison cu exigi a Fiscal ta abao. Hues ta haya cu tin motibo di peso pa subi e castigo. Hues a condena J.M.Z. na 24 luna di prison.
