Actualmente Departamento di Impuesto tin un total di 91.495 number registra pa vehiculonan di motor. Di acuerdo cu e ultimo cifranan, e cumplimento pa cu impuesto di vehiculo di motor di aña 2024 ta mustra cu un total di 72.728 number (79%) ta paga completamente y 17.675 number (19%) no ta paga of no ta paga completamente. Na e contribuyentenan cu a cumpli cu e pago di impuesto corectamente y na tempo di acuerdo cu ley, Departamento di Impuesto ta extende un palabra di elogio pa nan comportacion di pago ehemplar. Esaki ta demostra cu nan ta carga e responsabilidad cu nan tin pa cumpli cu nan deber di impuesto ora ta trata nan vehiculo di motor.
Esnan cu no a cumpli
Manera menciona, e incumplimento ta encera 17.675 number y ta como lo siguiente.
Incumplimento Cantidad
Solamente a paga impuesto di e prome mita aña di 2024 6.609 number
No a paga nada di e impuesto di aña 2024 9.262 number
Total 17.675 number
E incumplimento ta mas grandi den e plachinan di categoria A cu ta e categoria mas grandi. Aki ta sigui un bista di algun di e categorianan y e porcentahe di incumplimento den nan categoria.
| Categoria | A paga impuesto di prome mita di aña 2024 | No a paga impuesto di aña 2024 | Incumplimento total | Porcentahe di incumplimento |
| Plachi A | 6.280 | 9.262 | 15.542 | 20% |
| Plachi MFA | — | 540 | 540 | 18% |
| Plachi MFV | — | 80 | 80 | 32% |
| Plachi di nomber | — | 119 | 119 | 16% |
| Plachi DT | 51 | 145 | 196 | 16% |
| Plachi O | 27 | 36 | 63 | 18% |
| Plachi T | 8 | 231 | 239 | 72% |
| Plachi TX | 38 | 10 | 48 | 10% |
| Plachi V | 195 | 595 | 790 | 15% |
Areglo di pago
E contribuyentenan cu tin debe atrasa por pidi pa un areglo di pago. Pa debe atrasa di impuesto di vehiculo di motor, Departamento di Impuesto ta duna 3 luna maximo di tempo pa cumpli cu e debe aki.
Departamento di Impuesto ta urgi tur e automobilistanan y motociclistanan cu no a cumpli cu nan pago di impuesto di vehiculo di motor di aña 2024, pa haci esaki mas lihe posibel. Keda sin paga no ta un opcion. Na e momentonan aki e boet di 50% ta aplicabel y cuerpo policial tambe ta haciendo nan control di trafico. Un boet ta un gasto cu por wordo evita, si un contribuyente ta cumpli na tempo.
Ta importante pa menciona cu aña 2025 ta den porta y si no atende e debe atrasa, e contribuyentenan aki ta wordo permiti pa paga e impuesto di aña 2025 solamente si nan impuesto di vehiculo di motor ta na ordo. Asina so nan lo por ricibi nan plach’i number nobo.
