E aña aki COMPRA ta celebra 75 aña ta sirbi nos comunidad como un di e distribuidornan mas grandi di nos isla y parti esencial di nan operacion semper ta pa duna bek na comunidad y apoya instancianan cu mas mester di dje.
Pa sigui contribui na comunidad, e biaha aki a colabora cu empresario y pintor Sr. Franklyn Bareño, kende a bin cu un bunita iniciativa pa pinta diferente cuadra inspira pa naturalesa y architectura di Aruba y asina recauda fondo pa instancianan local cu tin un impacto positivo den nos comunidad. COMPRA LTD. a cumpra un collecion di 6 cuadra for di Sr. Bareño, di cual tur fondo a bay directamente pa Stichting Casa Cuna Progreso. E donacion aki ta special pa Managing Director di Compra, Sr. Hubert Dirks, mirando cu su tanta Sra. Maria Louisa Koolman tabata promer directora di Stichting Casa Cuna progreso.
Representatenan di Stichting Casa Cuna Progreso, Sra. Liliana Martis y Juana Alsira Solognier cu ta traha pa 34 aña cu e fundacion a bishita oficinanan di COMPRA pa ricibi oficialmente e donacion y tambe pa comparti cu Management di COMPRA mas di nan labor, esfuerso y dedicacion pa bienestar di mucha na Aruba.
Casa Cuna Progreso ta un internado pa muchanan entre 0-8 aña cu ta operando na Aruba pa mas di 66 aña. Nan meta ta pa duna bon cuido, atencion positivo, amor y structura na muchanan cu pa un of otro motibo no por biba na nan cas. Nan ta duna sosten temporal den guia di e muchanan y mayornan, famia cu e meta pa e mucha por bolbe bek den un ambiente familiar y saludabel . Casa Cuna ta depende riba contribucion publico y priva pa por sigui opera.
