Riba 21 di mei 2026 Minister di Finansa, Asunto Economico y Sector Primario, mr. Geoffrey Wever, a anuncia cu a logra di haya un prestamo di 160 miyon dollar riba mercado internacional. Den e comunicado di prensa Minister Wever a comparti:“E nivel di debe no ta subi. Tampoco e nivel di gasto di interes. Esaki no ta un debe nobo, pero un areglo nobo pa debenan di pasado cu ta caduca e aña aki. E resultado ta historico. E nivel di ‘country risk’ ta e mas abou cu Aruba a logra den henter su historia”.
Riba 22 di mei 2026 miembro di Parlamento Evelyn Wever- Croes ta reacciona di siguiente manera riba e relato di prensa:
“Usualmente mi no ta reacciona riba cosnan asina. Pero…nos tin surplus y cu orguyo e minister aki ta anuncia mas debe??? Really??? Anto e kier pa bo ta contento tambe”
Como minister di Finansa, mi kier clarifica algun punto importante cu ta, desafortunadamente, wordo presenta di manera incorrecto na pueblo dor di parlamentario Evelyn Wever-Croes. Ex prome minister, Evelyn Wever- Croes, cu su añanan di experiencia y conocemento di con e presupuesto di Pais Aruba ta hinca den otro, cu sa cu Pais Aruba (incluyendo e sector collectivo) mester tin por lo menos 1% di surplus pa ana y cu Pais Aruba mester usa e surplus aki pa paga debe, y cu e surplus aki no ta suficiente pa paga tur debe cu ta caduca den un aña y Aruba pa añas (tambe bou Gabinete Wever-Croes) ta refinancia parti di e debe tur aña, pues Aruba ta presta e placa aki y ta usa e placa aki pa paga debenan di pasado. E proceso aki ta hancra den Presupuesto di Pais Aruba y e prestamo di 160 miyon dollar cu Gobierno a caba di cera ta basa riba e Presupuesto 2026, cu a bai Parlamento di Aruba y a wordo aproba pa di Parlamento di Aruba. Pues NO ta trata di un debe nobo, no ta ta trata di un prestamo cu ta hisa e debe di Pais Aruba, sino un prestamo pa por repaga un prestamo di mas di 10 aña pasa. E proceso aki ta identico cu e proceso cu Gabinete Wever-Croes tambe tawata cana.
Parlamento, incluyendo parlamentario Evelyn Wever- Croes a ricibi e presupuesto 2026 y conoce e leynan di supervision financiero y e leynan presupuestario. Tur hende sa cu Pais Aruba no ta fia pa subi e debenan di Aruba, al contrario nos ta bahando nos debe, y e aña aki nos lo yega un “Debt-to-Gdp” di 61%, cu ta casi e mitar di Debt-to-Gdp na 2020 durante Covid cu tawata alrededor di 120%.
Lamentablemente parlamentario Evelyn Wever-Croes ta scoge pa malinforma pueblo cu e fiansa di 160 miyon dollar cu Aruba a cera na condicionnan faborabel lo bay hisa e debe di Aruba y ta purba di crea e impresion cu mirando cu tin surplus Pais Aruba no lo mester fia mas placa, esaki no ta berdad. Lamentablemente e parlamentario ta scohe pa mal informa pueblo simplemente pa meta politico.
Den presupuesto 2026 ta para claramente cu den aña 2026 Pais Aruba mester repaga Afl. 648 miyon florin na debenan di pasado, y cu Pais Aruba lo paga Afl. 121 miyon cu placa propio (esta e surplus) y cu e diferencia di Afl. 527 miyon lo wordo presta riba mercado di capital, pues ta claro cu mester presta pa repaga debe di pasado, aunke tin surplus.
Ta di lamenta cu un ex prome minister cu conoce e materia bon, lo mal informa pueblo na e manera aki, considerando cu durante Gabinete Wever-Croes II a subi mercado di capital varios biaha pa refinancia debenan di pasado, mientras cu tawata tin surplus tambe.
Minister Geoffrey Wever: “Como Minister di Finansa mi ta haya importante pa trece e informacion correcto riba un topico asina importante y mi lo sigui informa pueblo debidamente.”
