Pa medio di e comunicado aki, directiva di SPCOA kier a reitera cu e unico instancia autoriza pa tuma e decision pa sera John Wesley College ta e directiva di e scol.
Nos kier clarifica y duna un tiki mas splicacion, pa motibo cu nos a ripara cu ta wordo specula hopi den media tocante ken ta e instancia autoriza y tambe pakiko a dicidi pa sera John Wesley College.
Mester enfatisa cu e decision aki no tawata uno facil pa e directiva. Sinembargo, directiva, despues di a analysa tur e hechonan, no por a hasi otro cu tuma e tristo decision pa sera John Wesley College.
Nos ta elabora ariba e autorizacion di SPCOA y e hechonan cu a conduci na e decision akibou.
Pakiko SPCOA ta e instancia autoriza (bevoegd gezag):
- SPCOA como instituto di enseñanza ta un fundashon (stichting) y como tal ta ricibi fondo di subsidio di gobierno;
- A base di e statuutnan di SPCOA e directiva tin e manejo di e fundashon y ta, teniendo na cuenta e statuutnan aki, autoriza pa efectua tur e actonan di manejo y direccion, cual ta cai dentro di e proposito di e fundashon.
E decishon di directiva pa cu JWC ta basa ariba investigashon valido y di confianza en cooperashon cu partidonan externo.
E investigashon aki tin tres componente:
- Na prome lugar a constata, investiga y documenta irregularidadnan pa cu e control di calidad di enseñanza manera ta ancra den ley y maneho di SPCOA.
Como ehempel nos por mencioa dos punto di atencion:
- E maneho di aceptashon na MAVO
- Derecho pa forma klasnan
- Na di dos lugar a investiga e cantidad di alumno na e scol. Manera por wak den e tabel aki, e cantidad di alumno a keda baha drasticamente desde aña escolar 2016-2017 te cu awor:
| Cantidad di alumnonan per 1 augustus:2016-2017: 2272017-2018: 1592018-2019: 1652019-2020: 1252020-2021: 1192021-2022: 111 2022-2023: 64 |
- Na di tres lugar a investiga e finanzas y e posibilidad pa tene e scol habri cu e tiki alumnonan cu tin na e scol.
Un instituto di ensenanza ta ricibi subsidio for di un normbedrag pa cada alumno y pa cantidad di local di e edificio di e scol. Pa mas cu 7 anja JWC tin un caida den cantidad di alumno. Subsidio ta worde calcula a base di cantidad di alumno. Ademas, e derecho pa subsidio y formamento di klas ta ancra den ley, kiermen no por desvia di esaki.
Desde aña escolar 2022-2023 John Wesley College mester a opera sin un klas di vierde (4e) mavo, pa motibo cu no tin suficiente alumno pa por forma un mavo 4 klas.
A base di e cifranan di e cantidad di alumno por hasi un pronostico tambe pa e siguiente klasnan pa e añanan venidero y bo por wak cu e scol ta keda cu e problema pa jena e klasnan.
Lastimamente mester a jega na e conclusion cu e no ta factibel pa tene e scol habri cu 64 alumno y mirando e pronostico pa e añanan venidero e no ta razonabel tampoco pa a mantene e scol habri.
E conclucion aki ta basa ariba e calculo di e subsidio cu SPCOA ta ricibi pa cada alumno y e gastonan cu ta necesario pa por duna un enseñanza di calidad. E subsidio cu scolnan ta ricibi no ta cubri tur gasto cu un scol tin pa e opera su scol. Banda di subsidio scolnan ta pidi un ouderbijdrage.
E ouderbijdrage aki ta necesario pa por paga o.a. salario di werkster, gastonan di airco, schoolfonds actividadnan, etc.
Menos alumno ta nifica menos subsidio. Pero menos alumno no necesariamente ta nifica cu e gastonan ta bira hopi menos. Esaki ta conduci cu si a tene e scol habri, lo mester a hisa e ouderbijdrage na un suma cu no ta razonabel.
Manera a menciona anteriormente, e no tawata un decishon facil pa e directiva y pa e Directora General, pero e tawata un decision necesario paso cu e cantidad limita di alumno lamentablemente, e no ta factibel financieramente pa tene e scol habri.
